كود ياوندي ///
3 سوايع قبل الماتش بدا الجمهور يدخل للتيران. العدد قليل ولكن كاين شي بركة. باش توصل للتيران ديال احمدو احيدجو بحي مفاندينا بياوندي خاصك تضرب طواالة. كلشي محاصر. البوليس داير الباراج الاول وبعدو المنظمين والجيش موجد. غير الدخلة للتيران تعطي الانطباع على الوضعية الامنية بالبلاد. القضية صعيبة والدولة خايفة من عمليات لتيارات قومية وارهابية. كانت خرجات تهديدات قبل.
البارح الكاميرون عطات صورة مشرقة على البلاد. على ديناميتها. الافتتاح للي كان تأييد لحكم رجل الكاميرون القوي بول بيا عطا نتيجتو. كلشي داز هو هاكاك. رئيس اتحاد كروي من دولة افريقية جنوب الصحرا تلاقاو “كود” هاد الصباح قال باللي الكان سالا البارح. سالا حقاش اللي قلبات عليه السلطات المحلية اللي قلب عليه الرئيس تحقق. افتتاح فيه فرجة وبحضور جماهيري كبير ونقلاتو دول كثيرة وفوق هاد الشي السوريز على الگاطو ان الماتش سالى بانتصار الكاميرونيين على بوركينافاسو بجوج لواحد.