كود كازا///

الجيش الجزائري اللي كان هادي شهرين فصف بوتفليقة وگاع الناس ديالو، تقلب عليهم فخطرة وحدة، وكيحاول دابا يسيطر على الاوضاع بشتى السبل وبقرارات خطيرة بحال توقيف الجنرال مدين وطرطاق وسعيد بوتفليقة.

طبعا هاد الناس كانت عندهم يد فالفساد اللي فالجزائر، ولكن حتى الجيش كان منخرط فهاد الفساد، والادهى من هادشيكولو هو ينوض الجيش ويعتاقل المدنيين ويدير معاهم تحقيق، وهادشي طبعا تحت غطاء التحركات المشبوهة للثلاثي الموقوف.

السياسية الجزائرية لوسزة حنون ناضت لبارح وهاجمت قرار التوقيف وعتابرات أن هادشي اللي كيديرو الجيش غيولد نموذج بحال مصر والسودان، هادشي اللي خلا جريدة الشروق اليوم تخرج وتهاجم الموقوفين الثلاثة وتعتابرهم رؤوس العصابة، وهي نفس الجريدة اللي كانت هادي شهرين كتمجد فبوتفليقة والناس ديالو، وعتابرات الرئيس السابق رجل الاجماع.

هادشي اللي كيديرو الجيش الجزائري بالتأكيد يجر البلاد نحو مستقبل مظلم، والجيش دائما كتكون بلاصتو فالدفاع عن الامة ماشي يدخل فالسياسة ويطلع لي بغا ويهبط اللي بغا.