وكالات //

خلقات واحد البنت ميريكانية سميتها “هانا” البوز بشكل كبير في ميريكان، وولاو الآلاف كيتابعوها على إستغرام، بسباب واحد المرض نادر كتعاني منو.

هاد المرض سميتو ARFID وكيقولو الأطباء أنه اضطراب سلوكي عقلي كيخلي الدري الصغير مكياكلش طبيعي بحال الناس ومكيحملش الماكلة، والماكلة كلها كتجيه باسلة.

وهاد المرض يقدر يتطور حتى يتسبب فأمراض أخرى أكثر خطورة تخليه يدخل للسبيطار وياكل غير بالتيو.

ولكن “هانا” تحدات كاع الصعاب وولات كتدير تحدي يومي مع المتابعين ديالها باش تاكل الماكلة بزز، وهو شي لي خلا الآلاف يتابعوها ويشجعوها يوميا.

دابا “هنا” ولات عندها مليون ونص متابع غير فأنستغرام بوحدو، وولات نجمة حقيقية في ميريكان.