محمد سقراط-كود///
نصاب واحد قدر يجمع تلاتة دالمليار غير من الدواور نواحي السطات، غادي تلقى أغلب لي نصب عليهم مستافدين من المساعدة ديال خمسمية درهم لي كتعطي الدولة للفئات الهشة، ومع ذلك الناس مستعدين يبيعوا أراضي جدودهم على ود الطاليان، طبعا من حق أي واحد يحلم بمستقبل أفضل في أي بلاصة في العالم، الموشكيل ماشي في طموح شباب في مقتبل العمر للهجرة لتحسين الأوضاع، ولكن في الكمية ديال الفلوس كاش لي كتدور عند الناس غير راكدة، مكتدير رواج مكتخلق فرص شغل مكتصاوب بيها مشاريع مكتساهم في إقتصاد، فلوس واقفة مضروبة تحت الزليج كيجمعوها حتى يجي شي نصاب ياخدها مجموعة، وهادشي لي كيوقع هادي عشرات السنين.
دولة بإقتصاد على قد الحال وناتج داخلي خام ديال بلاد كلها قد ثروات شخصية ديال أفراد راه خاص تكون دارت حلول جذرية لهاد الموشكيل من شحال هادي، الكاش ماخاصوش يبقى يدور في السوق ويتعمم الدفع بالبطاقة والإلكتروني عموما، كارط كيشي في جيب الواحد غير متقل بيها البزطام، والى بغيتي تخلص بيها خاص تمشي تيري من الكيشي باش تخلص كاش، قطاع الصحة كامل لا العمومي لا الخصوصي خاص يولي الأداء بالبطاقة ، خاص الدولة توجه لهاد طرق الدفع الحديثة، راه كاين بلدان تقريبا مابقاوش كيتعاملو بالكاش كاع، كاين بلايص فيهم دراري صغار عمرهم تعاملوا بالفوس وراق أو صرف نهائيا، الهند هادشي لي دارو فاش بغاو يهيكلوا اقتصاد البلاد ناضوا بلدلوا وراق الفلوس وجمعوا الفلوس القديمة وعرفوا كل واحد شحال طامر تحتوا وحلو ليهم حسابات بنكية فين يحطو فلوسهم وتكون داخل النظام.
هاد الفلوس مطمورة عند الناس غير من سعد النصابة والشفارة وصحاب شركات التسويق الهرمي لي كيجمعوا الضحايا بالألاف وكل مرة كتبان وحدة وبنادم باقي مابغى يعيق، والتعاملات المالية كتكون بلا دليل وفلوس دغية كتغبر وكتخلط بالأموال الغير المشروعة، دولة بحال المغرب باغا تدير رعاية إجتماعية وتوفر لمواطنيها العيش الكريم راه أهم حاجة خاص تدير هي تهيكل الاقتصاد وأول خطة في طريق الهيكلة هو الكاش مايبقاش يدور عند الناس إلا بنسبة قليلة، راه في بلدان كثيرة كتلقى مول كروصة ديال طايب وهاري وكيتخلص بلاكارط، الطلاب في الزنقة يمكن تصدق عليه بلاكارط ، وسنوات هادي باش دول عايشين غير بتطبيقات منهم كتخلص وتدير أي عملية كتحتاج الفلوس يوميا، إلا هاد البلاد الى طحتي فشي موقف ولقيتي راسك ماهازش معاك الفلوس غير نسى تخلص بلاكارط حيت قليل لي عندو، وحتى لي عندوك يبقى يتحجج بلي راه الريزو طايح.
