نجوى المالحي-كود//

أب الرابور المغربي كريم خربوش المشهور بفرانش مونتانا خرج البارح في فيديوهات بعدما جاه قرار ديال الافراغ من دارو في كازا. ووجه رسالة لولدو الملياردير الحاصل على الجنسية الميريكانية باش يعاونو.

الراجل بان في حالة صعيبة ووجه نداء لولدو لي عايش قمة النجاح في ميريكان باش يعاونو ويوقف معاه وقال في الفيديو: “ولدي قال لي مانبقاش نخرج في الصحافة ومانبقاش ندير الفيديوهات”، لكن دابة ختار يخرج ويدوي باش يلفت الانتباه للمعاناة ديالو، واضاف”الا عطاني وعاوني الله يخلف عليه. الا معطانيش الله يخلف عليه”.

وكيتاهم الأب مراتو وخوتها بالنصب عليه والاحتيال. وقصة أب مونتانا هي شهيرة بزاف باعتبارو الشخص لي مشا حرق راسو قدام البرلمان بعدما خداو ليه العائلة فلوسو الوقت لي كان هو وولادو في ميريكان.

القصة كانت دازت في برنامج “قصة الناس”، وبعدها تعرف مونتانا وكانو تلاقاو وعطاه فلوس وشرا ليه طونوبيل “jeep”.