أسماء غربي – كود///

غير تكون سميتك أنطونيو وعينيك زورق وتقول للمغاربة غاتوجد ليهم لوراق تسنى لفلوس يبداو هابطين عليك كي الشتا، وغاترجع مصدر موثوق أكثر من الاتحاد الاوروبي.

هادشي لي وقع لأزيد من ألف ضحية، تاقو فواحد الصبليوني عندو وكالة خدمات فمدريد كانت معاه سمسارة مغربية، وبداو كيقولو للناس غايديرو ليهوم لوراق وكياخذو عليهم 7 الاف اورو للواحد، وملي عاقت بيهم السلطات وشافت طلبات الاقامة كثرات بزاف وكلها جايا من وكالة انطونيو قرقبات عليهم، وكتاشفو أن گاع لوراق لي حاطهم هاد السيد مزورين، وكيزور شواهد الاقامة وكولشي.

دابا لمغاربة لي كانوا ضحايا هاد السيد غايوقف ليهم القلب، حقاش كاين لي دفع حتى لعشرين مليون سنتيم باش ياخذ لوراق لولادو، وبعملية حسابية بسيطة السيد ضرب اكثر من سبعة دالملايير من عند لگنادح.