كود سبور//

أكد وليد الركراكي من بعد نهاية مباراة المنتخب الوطني المغربي ومنتخب الباراكواي الودية وهي الأخيرة فمعسكر الصبليون الاعدادي لكأس العالم المقبلة فقطر، أن ليكيب ناسيونال باقي مواجداش للمونديال، لكن للعابا غيخدمو باش يكونو مزيانين.

وفتصريح له بعد تعادل المنتخب الوطني المغربي مع الباراكواي صفر لصفر قال وليد الركراكي: “كنا باغيين نربحو الماتش أمام الباراكواي لكن ضيعناه، فالجولة الأولى ماكوناش فالمستوى وخصوصا فالجانب التكتيكي وضيعنا بزاف ديال الكرات وبغينا كاملين نمشيو للكرة وماخلقناش المساحات”.

وأضاف الركراكي: “استفدنا بزاف من هذا الماتش، وجربت واش نقدرو نلعبو بصانعين ديال الألعاب ونخويو وسط الميدان، لكن هاذ الأمر بان صعيب اليوم، لكن كاينين حاجات زوينة فالجولة الثانية لعبنا الكرة دياليا مع الرفع من الريتم وليشونجمون عاونونا كنا باغيين نماركيو لكن ما توفقناش، ومزيان لينا حيث عرفنا اليوم ريوسنا بلي باقيين ماوجدينش المونديال وخاصنا نخدمو.

ووصال الركراكي الحديث ديالو: “اليوم بان علينا العيا ديال المجهود اللي درنا فماتش الشيلي واللي رجع علينا ولكن مزيان وبرافو للعابا، اللي وصلات لهم الافكار ديالي، بغينا اللعبو الكرة وخاصنا نغامرو ونهزو الريتم وغنخدمو باش نكونو مزيانين”.