كمال لمريني_ كود//

ارتفع عدد الوفيات ف صفوف الاشخاص اللي شربو لالكول ف وجدة، اليوم الأحد، ل 9 د الحالات، ف حين سلكوا جوج بعدما غسلوا ليهم المعدة.

وذكرت مصادر ل”كود” أن الحالات جداد كانوا ف وضعية حرجة، وأنهم كانوا ف قسم الإنعاش كيتلقاو العلاج، إلا أن تدهور الحالة نتاعهم خلاهم افارقوا الحياة.

وأشارت المصادر ذاتها، إلى أن من الناس اللي ماتوا إمرأة، وأنهم كانوا كيشربوا لا لكول ف حي المير علي الشعبي.

وأثار هذ الأمر استنفار كبير في صفوف المصالح الأمنية، وهاد الشي اللي خلا لابيجي د ولاية أمن وجدة كيقرقبو على كراب فالعمر نتاعو 31 عام، من ذوي السوابق القضائية ف السرقة وبيع شراب بدون ترخيص، يشتبه التورط نتاعو ف بيع مواد مضرة بالصحة العامة والتسبب في وفاة المستهلكين