كود كازا ////
كلشي هلل وفرح ونشط بخبر ماشي صحيح. كاليك قبل ما يوصل الملك محمد السادس لابوجا عاصمة نيجيريا٬ حيدات هاد الدولة العلم ديال البوليساريو وعوضاتو بالعلم المغربي. المشكلة اللي تصيد فهاد الفيلم ماشي ناس بساط بل صحافيين ومواقع اخبارية تحدثت عن النصر وووو. كون شوية العقل والتمييز كانت “كود” نشرات خبر استقبال الرئيس النيجيري محمد بخاري لسفير البوليساريو في ابوجا وسلمو واوراق الاعتماد غير هادي اسبوعين. منطقيا يستحيل تغيير موقف دولة من اكبر الداعمين للبوليساريو قبل حتى ما بدا الزيارة الرسمية للملك.
دابا نرجعو لهاد الفيديو اللي هللو ليه لمغاربة. الفيديو وفق ما نقلت “يا بلادي” دار فنيروبي وبالضبط المركز الدولي للندوات بكنياتا. علاش حيدو هاد الدرابو؟ تضيف نفس الجريدة انه ما بين 17 و22 يوليوز احتضن المركز الدورة 14 من الندوة الدولية حول التجارة اللي منظمات منظمة تابعة للامم المتحدة وبما ان البوليساريو ماشي دولة حيدو علمها.
يعني هاد الشي قديم وثانيا حتى كينيا مع اثيوبيا عندها علاقات قوية مع البوليساريو.
علاش كتكذبو على المغرب وتبيعو لهاد الشعب اخبار ماشي صحيحة وتسويقها على انها فتوحات وانتصارات وهي غير فخيال اللي سوقها