الوالي الزاز كود العيون ///
المغرب عندو خدمة كبيرة قدامو فافريقيا باش يدارك هاد التخربيقة اللي دارها الحسن الثاني فالثمانينات من الاتحاد وخلى الجزائر وتربية يديها البوليساريو دير ما بغات. دابا قرر المغرب يرجع ويتحرك ولكن هاد المجهود طويل الامد خاصو رجالاتو من السفراء ووزير خارجية مزيان ماشي الفعفاع اللي كفسها وجاب سفراء عيانين. واش اللي فشل فاليونان وما عمرو طفرو تعطيوه اعباد الله غول القارة الافريقية جنوب افريقيا.
ما علينا هادي قصة اخرى دابا نرجعو ليها. المغرب كيتحرك فقارة وفدول مع البوليساريو. دابا كاينة زيارة للملك لنيجيريا ولكن قبل هاد الزيارة ناضت البوليساريو وطبعا بخدمة ديال الجزائر ورسلات ماء العينين الصديق كاليك دارتو سفير فوق العادة فنيجيريا. واش انتي دولة حتى يكون عندك سفراء. عند المغرب اللا ولكن عند نيجيريا اللي من اقوى الدول الافريقية اه. اسيدي هاد السفير استقبلو الرئيس محمد بخاري.
هاد الاستقبال جا بعد ما المغرب باغي يطور علاقاتو مع الداعمين للبوليساريو من اثيوبيا وكينيا ونيجيريا. غادي يدير استثمارات ضخمة فالفوسفاط. هادي زريعة خدام عليها ملك البلاد ولكن خاصو وزير خارجية ديال بصاح وفريق كبير باش يخدم يوميا. يعني خاص سفراء اخرين ماشي اللي عينهم مزوار، راه فيهم شي كوارث
