سهام البارودي – كود//
شحال هادي كان بعض الشعراء باش ياكلو و يشربو و يعيشو كاينظمو الشعر فالسلاطين، كايمدحوهم و يتغناو بصفاتهم، و بلاطات الملوك و السلاطين ديال معظم الدول الاسلامية كانت عامرة بالشعراء لي كان السلطان كايرشرش عليهم الفلوس و الذهب باش يتنافسو فشكون غاينظم احسن قصيدة فالسلطان ! و هاد الثقافة عندها تفرعات و كانقدرو نلقاوها فمعظم الدول لي عندها ثقافة شفهية مثلا فالسينيغال و مالي لي فاش كايكون شي عرس مازال لحد الآن كايجيو ليه ما يسمى بالles griots و لي خدمتهم هي يمدحو فالعريس و عائلتو و عائلة المرا باش يروفو عليهم بفليسات و يتهلاو فيهم !
ولكن ديك الوقت ماشي هي هاد الوقت و المعايير اليوم تختلف ! الدولة ديال شحال هادي ماشي هي الدولة العصرية لي كانطمحو نشبهو ليها ! اليوم كانتسماو مواطنين ماشي رعايا و حتى السلاطين مابقاوش ولاو ملوك و رؤساء دول لي عليهم اجماع من الشعوب ديالهم و بينهم تعاقدات كايتافقو عليها بالنظر للانساق السياسية ديال كولا بلاد ، فرانسا ماشي هي سبانيا لي ماشي هي المغرب لي ماشي هوا السعودية … و حتى الفنان ( الشاعر او المغني او الممثل) تبدل و الدور ديالو مابقاش كيما كان ! بالعكس الفنانين كان ليهم دور كبير فالثورات الثقافية و نشر قيم الديموقراطية و الحداثة و الحقوق و الحريات بين الشعوب ! و ساهمو فخلق الوعي السياسي ! ومابقاوش دوك الاغاني على الزعماء و السلاطين آلامود الا فالانظمة الشمولية فحال الكونغو -الزايير سابقا يامات موبوتو سيسيسيكو و كوريا الشمالية حاليا لي كايصبحو على اغاني تمدح الزعيم و كاينعسو عليها !
هادشي كولو طرا و لالة الداودية فدار غفلون ! غا ما گال ليها راسها نوضي و ديري اغنية بالخليجية على الملك ديال السعودية و مسمياها “سلمان الحزم” و تسلم لينا يا بوفهد يا ذرانا … شكون “نا” آ الداودية شكون “نا” !؟ لاش مدخلة معاك گاع المغاربة فالاغنية ؟! المشكل الكبير هوا انه بعض الفنانة فحال الداودية كايتستخفو بهاد الامور يصحابها غا نوضي الصباح و كتبي الكلمات و لحنيهم و سجلي الديسك مع الخمسة د العشية و لوحيه فاليوتوب مع الطناش د الليل و صافي فحال الاهداءات لي كادير فالطلعة د الديسك “آياوهادي فخاطر الخواطر ناس كازا و برشيد و الجديدة اونجينيرال ! فخاطر خويا زغيدة حفيظ و خويا التهامي الناس الكبار ” !راه هاد الاغاني مورقين علاش كايدارو ! و شكون كايديرهم ! الفين و عشرين هادي مابقاش هادشي واكل ! راه كاينين حيثيات سياسية خاص يراعيو ليها خصوصا بلي العلاقات ديال المغرب و السعودية هاد العام ماشي تال لهيه و ديك “عاصفة الحزم” لي مسميا عليهم اغنيتها المغرب انساحب منها شحال هادي !
لاكانت عينيك فالحفلات لي كاينظم محمد بن سلمان و باغا تحضري ليهم فحالي حضر ليهم المجرد و فنانة اخرين راه من حقك طبعا ! و لاكان عينيك فشي اكرامية مضخمة حتى هي من حقك طبعا ! و لا كنتي باغا ضبري على راسك فالسوق الخليجية هادشي مزيان الله يسهل و لكن كاينين بزاف ديال الطرق الغير المبتذلة و العصرية باش توصلي لهادشي و اهم الطرق هي الخدمة المزيانة و الجمهور الواسع لي يقدر يفتح ليك البيبان د السعودية و الخليج كامل و تا بلاد القوقاز بلا هاد الاغاني ديال العهد العباسي خصوصا و نتي مامحتاجاش تبارك الله لهادشي لاغنيتي غا السواكن و نتي تاكلي و تشربي وانا حرارت عليا يا ميرا تاكلي و تشربي نتي و ميرا و واليديها تايبانو واليديك !
