سهام البارودي – كود//
لاطلبتي مني نعرف ليك النجاح فجوج كلمات غانقوليك هوا ” نجاة عتابو ”
واخا شي مرات كاتخرج بشي تصريحات خرائية و ماكانتافقش معاها فيهم و لكن مانقدرش نخبي بلي انا معجبة بنجاة عتابو ! اولا كفنانة حيت فعلا عندها صوت من احسن الاصوات لي سمعت فحياتي و ثانيا كمرأة ناجحة ! قصة من قصص النجاح المبهرة لي تستاهل انها تتقرا فالمقررات للاجيال الصاعدة !
نجاة عتابو قدرات انها تبدا من الخميسات فالسبعينات و اا الثمانينات و توصل و تنجح ! واش عرفتي شناهي تبدا من الخميسات فالثمانينات و تنجح ؟ الخميسات دابا فالفين و تسعطاش و ماتقدر تبدا فيها تاخرية و تنجح! سناك هوا اللخر تقدر تحلو و تسدو بقوة الركود لي كاين فديك المدينة ! مدينة مهمشة ! منسية ! فقيرة ! مازال العيالات كايتساراو فيها لاويين عليهم الفوطات و محملين ولادهم ولايحين عليهم الكواش باش مايضربهمش البرد ! المدينة الوحيدة فالكرة الارضية لي الفوطة و الكاشة كايدخلو فالگارد روب ديال الحوايج ! تقدر تلبسهم و تمشي بيهم الادارات و المقاطعات و الكوميساريات و تمشي للمحكمة تدعي جارتك لي شفرات ليك گرصون فازگ من السطح و نتي لابسة فوطة !
نجاة عتابو الصوت لي خرج لينا من رحم المعاناة و الفقر و التهميش باش يطربنا و يغني لينا آ الوليد آ الوليد هانا جيت انا جيت واخا جيت جونيمار … انسانة ناجحة بجميع المقاييس ! غنات و تحدات الظروف و القيم البالية ” ماتغنيش ! ماتشطحيش ماديريش ” و نجحات و دارت اللعاقة اللعاقة اللعاقة ووصلات خمسين عام و فاتتها و دابا عندها برنامج ديالها فوحدة من اكبر القنوات فالعالم ” الام بي سي” حتة وحدة ! سيدة جميلة ! انيقة ! بصحة جيدة ! أم ناجحة و شنو بغا الواحد اكثر من الحياة ؟ سيدة من والو ! من تحت تحت الصفر صنعات المعجزة ! آ سيدي برافو عليها
تخايلو معايا كون نجاة عتابو ماتحداتش الظروف ديالها و ماتحداتش القيم البالية لي كانت باغا تسيطر عليها و ماهرباتش باش تغني ! شنو كانت غاتكون اليوم ؟! كانسانة من اسرة متواضعة ساكنة فوحدة من مدن المغربي المنسي ؟! كانت فاحسن الاحوال غانشوفوها فرملية فالسبيطار الكبير ديال الخميسات و لا موظفة فقيادة احفور المعطي غارقة كريديات ديال اكدوم و مهلوكة بالسكار و دافعة شي جلابة عند الخياط كاتساينها توجد ! هادشي لاماكانتش مجوجة شي عسكري فالصحرا كاتساينو من ست شهور لست شهور يجي يلقحها فالخميسات و يرجع للقشلة !
القيم البالية ديال ماتغنيش ! ماتشطحيش ! ماتخرجيش ! ماديريش ! لي كاتحكم فحياة النساء و كاتقمعهم و كاتحرمهم من حريتهم فاختيار الحياة لي تناسبهم ! هاد القيم البالية هي لي خلات شحال من مرا عندها موهبة تمثيل ! غناء! رسم تدفن راسها وسط شي حياة بسيطة ! فقيرة ! مقموعة ! و تعيش و تموت و هي منسية بالرغم من انها كان ممكن تكون فنانة كبيرة او سيدة اعمال او شخصية مهمة يستافد منها المجتمع و تفيد راسها هي الاولى !
نجاة عتابو ! تشنويت ! تاباعمرانت ! هادو راه عيالات گادات ! تبارك الله عليهم ! قصص نجاح مايد اين موروكو تستاهل تتقرى للشباب و يعرفهم فحال لي كايعرف قصة نجاح الشعبي ! و الحاج غلف و التازي مول مشطة التازي ….
و الله يعز العيالات القادات لي كايتحداو الظروف و القيم البالية و كايعيشو الحياة !
