كود علي الصافي ////
البارح كانت اول مواجهة فالاعلام العمومي بين المرشحين الاربعة لرئاسة الحكومة الاسبانية. قبل ايام من الانتخابات التشريعية اللي غادية تكون الاحد الجاي 28 ابريل 2019 شهدت “الاولى” القناة العمومية الاسبانية اول مواجهة بين بابلو اگليسياس زعيم بوديموس والبير ربيرا زعيم سيوسادانوس وبابلو كاسادو زعيم الحزب الشعبي وبيدرو شانشيز زعيم الحزب الاشتراكي. المواجهة دامت 100 دقيقة وعرفت غياب زعيم “بوكس” الحزب اليميني اللي ممكن يحصل على اكثر من عشرة بالمائة من الاصوات فالانتخابات التشريعية ليوم الاحد. السبب هو انو ما عندوش تمثيلية فالبرلمان الحالي.
القادة الاربعة اللي كلهم من الجيل الجديد دارو مواجهة قوية هدرو على كلشي كيهم اسبانيا. الضرائب والمالية العمومية واعداد التراب وتقسيم الثروة وطبعا الانفصال من خلال قضية كاتالونيا.
المواضيع الخارجية ما حضراتش. لا الاتحاد الاوربي لا قضية الصحراء لا قضية المغرب لا ما يحدث في الجزائر.
رغم هاد الشي فاليمين المتطرف غادي يحقق هاد النتائج غير من خلال مواضيع بحال الهجرة والعلاقة مع المغرب بل شي متطرفين منو قالو خاص اسبانيا دير حائط تحمي سبتة ومليلية. واخا هاد الشي ما تجبد والو. ما هدروش عليه.
اليوم كاينة مواجهة ثانية فقنوات “الثالثة” و”السادسة” واذاعة “اوندا سيرو” يمكن يثار موضوع الحائط. موضوع الصحراء. موضوع العلاقات مع المغرب. نتسناو ونشوفو
