نجوى المالحي-كود//

المغنية الشعبية زينة الداودية علنات تضامنها مع الرابورة بسيكو كوين لي تعرضات السيمانة لي فاتت لاعتداء وحشي في الصخيرات.

الداودية لي يالله طفات عليها الشمعة حطات تصويرة بسيكو وهي كاملة دمايات وكتبات عليها “حرام هادشي والله تا حرام. واخا يكون شنو ما كان. واخا تكون معرت شنو دارت. لا للعنف”.

بسيكو مازال كتحاول تتجاوز الأزمة، وقالت في حوارات صحافية أنها عندها هرس في نيفها وخاصها دير عملية جراحية.

وقالت الرابورة أن والدين الدري لي ضربها في الزنقة جاو طلبو منها السماحة لكن هي مابغاتش تنازل وقالت أن العنف لي تعرضات ليه مايمكنش تسامحو، واضافت “كيفما بقاو فيا عائلتو. بقا فيا راسي كثر”.