كود كازا//
كي العادة المغربي كيحسب الدولة هي مو غير توقعليه شي حاجة خاصها تجي تجري تعتقو واخا يكون مزبلها، وهادشي لي واقع لبعض الطلبة المغاربة في الصين لي باغين السفارة تردهم لبلادهم وكالسين كيتباكاو على فين هي السفارة فين هي الدولة تفكهم من إحتجاز الصين ليهم حيت راه كاين وباء يجتاح العالم.
طالب مغربي باغي الدولة تتدخل وتجيبو للمغرب هو وفيروس كورونا
Publiée par GOUD sur Samedi 25 janvier 2020
دابا هذا طالب علم وقاري زعمة وكيشوف ان العالم مهدد بوباء فتاك وقاتل وهو فالمدينة فين كاين الوباء ومع ذلك باغي السفارة تتدخل وتردو عند مو، في الوقت لي العالم كيحبس تنقل المواطنين وكيتسدو المطارات باش يتم إحتواء الوباء القاتل، كاين مغربي كيبكي على السفارة تجي تهزو من المنطقة فين كاين الوباء وتجي تحطو فالمغرب ويتم إستقبالو بالتعناق والبوسان من الحنك ربعة ديال المرات.
راه هادشي لي كيطالبو بيه هاد الطلبة ومعاهم حتى دوك البكاية ديال الفايسبوك غير معقول بتاتا واش بنادم مسطي ولا ضاربو الله ، هذا راه ماشي إجلاء من منطقة نزاع، هادي راه مغامرة ومخاطرة بحياة كاع المغاربة وبحياة القارة كلها ومع ذلك بنادم أناني وكيفكر غير فراسو وباغي الدولة تفششو وتدلعو وتدير ليه داكشي لي قال ليه راسو واخا يكون غلط، وافيقوا شوية.