الرئيسية > آراء > هاد الجيل الجديد غايدوز فالضو حيت عندو مقررات مدرسية فيها افكار تنويرية حداثية متصالحة مع الرافد العبري كمكون مهم من الهوية المغربية ماشي فحالنا حنا جيل التسعينات لي كان أول درس كانلقاوه قدامنا فالتحضيري فحصة “التفتح الفني” هوا ارسم الكفار / ارسم المسلمين ! آشمن تفتح آ ودي ؟ كبرنا فالظلام والتخلف
19/10/2021 18:00 آراء

هاد الجيل الجديد غايدوز فالضو حيت عندو مقررات مدرسية فيها افكار تنويرية حداثية متصالحة مع الرافد العبري كمكون مهم من الهوية المغربية ماشي فحالنا حنا جيل التسعينات لي كان أول درس كانلقاوه قدامنا فالتحضيري فحصة “التفتح الفني” هوا ارسم الكفار / ارسم المسلمين ! آشمن تفتح آ ودي ؟ كبرنا فالظلام والتخلف

هاد الجيل الجديد غايدوز فالضو حيت عندو مقررات مدرسية فيها افكار تنويرية حداثية متصالحة مع الرافد العبري كمكون مهم من الهوية المغربية ماشي فحالنا حنا جيل التسعينات لي كان أول درس كانلقاوه قدامنا فالتحضيري فحصة “التفتح الفني” هوا ارسم الكفار / ارسم المسلمين ! آشمن تفتح آ ودي ؟ كبرنا فالظلام والتخلف

سهام البارودي – كود//

فاش كنت صغيرة فالابتدائي كان أول درس كايستقبلونا فيه فالتحضيري فحصة “التفتح الفني” شوف سخرية القدر كي دايرة ! هوا بعنوان ارسم الكفار / ارسم المسلمين ! جيل التسعينات عاقل على هاد الدرس و كيفاش كنا و حنا اطفال عندنا ست سنين كانتفننو في رسم الكفار بلحايا طوال و حجبان غلاظ بشعين خايبين فحال شيوخ السلفية لي عندنا فالمغرب و لي كانو تشدو مورا احداث سطاش ماي الارهابية !

جيل التسعينات كبرنا مع مقررات فيها بزاف ديال التمييز و الاقصاء و الافكار الظلامية و مع اساتذة كانو كايزيدو يرسخو دوك الافكار فدماغنا ! انا مثلا كانعقل نهار الاستاذة فالرابع ابتدائي لقات واحد الانجيل عند تلميذ و بدات كاتقرا لينا منو و كاضحك و تستهزأ و تاحنا كانضحكو معاها حيت  هي الاستاذة ديالنا كيفاش غادي تضحك و نبقاو ساكتين واش غانعرفو احسن منها ؟! و الاستاذ فالثانوي لي كان قالينا بلي سبحان الله الكفار فأوروبا وجوهم بيضاااا مافيهاش الدم حيت كاياكلو الخنزير يا العياذو بالله ! و الاستاذة لي كانت كاتقولينا بلي اليهود فيهم واحد الريحة خانزة و بلي ” كول ماكلت ليهودي و نعس ففراش النصراني ” حيت ماكلة ليهود بنينة و لكن ريحتهم خايبة !

المساهمة ديال المقررات التعليمية و ديال المدرسة فانتشار الفكر الظلامي الاقصائي تجاه الآخر ماخافية على حتى شي واحد و داكشي لي عطانا عدد ديال المغاربة لي مشاو لافغانستان و سوريا و العراق ! و داكشي لي عطانا اعداد ديال المغاربة عايشين معانا فالرباط و أگادير و الدار البيضا و العطاوية و لكن دماغهم فالسعودية و افكارهم من القرون الوسطى و داكشي طبعا لي عطانا احداث سطاش ماي الارهابية … و الاهم من هادشي انه عندنا اجيال ديال المغاربة مامتصالحاش مع الرافد العبري كمكون مهم من الهوية ديالها

هادشي علاش كانفرح اليوم فاش كانشوف بلي الدولة بدات كاتستدرك الأمر ! ووعات بالخطر لي كاتشكلو المقررات و الافكار لي كاتروج ليها و بأهمية انه المقررات المدرسية تنشر فكر تنويري حداثي ! مافيهش تمييز ضد الآخر على اساس الجنس او الديانة ! الحمد لله لي الجيل ديال اليوم يقدر يشوف صورة يهودي مغربي بالطويقية ديالو فالمقرر المدرسي و يعرف شكون هي اودري ازولاي المغربية لي ولات وزيرة ففرانسا …كانفرح فاش كانشوف تنزيل الدستور فالمقررات المدرسية ! و محاربة زواج القاصرات ! و التصالح مع التاريخ ديالنا لي اليهود لعبو فيه دور كبير.

هادشي طبعا ماعاجبش بزاف ديال السلفيين و اللحايا الظلاميين ! لي ناضو كايغوتو مؤخرا حيت شافو صورة يهودي فمقرر مدرسي و حيت شافو قصة زواج قاصرة سميتها عائشة من واحد شارف عليها ! مافهمتش قصوحية الوجه لي عند هاد الطوبّات باش يخرجو من الغيران ديالهم و يغوتو على المقررات المدرسية ! شنو بغيتو ؟ نبقاو ناكلو الخرا ؟ يبقاو ولاد المغاربة يقراو افكار هدامة ظلامية اقصائية ! نبقاو نستقبلوهم فالمدرسة بارسم الكفار ارسم المسلمين و نعلموهم بلي الآخر خايب و مامزيانش و حنا خير أمة اخرجت للناس ؟

هادشي لي كايديرو فيه هاد الناس راه جريمة سميتها معاداة السامية و كون كانو فشي دولة اخرى كون سيفطوهم يترباو على هاد الافكار الخروانية لي كاينشرو !

موضوعات أخرى

06/12/2021 17:30

غايربحو غير البرد كيف ديما.. لوبي الدزاير والبوليساريو كيحاول يضغط عاوتاني على نيوزيلاندا باش توقف إستيراد فوسفاط الصحرا المغربية

06/12/2021 16:00

بنكيران يستنجد بالمثلية الجنسية! أراهن عليكم كثيرا أيها المثليون لأعيد لحزب العدالة والتنمية وهجه السابق