احمد الطيب كود الرباط//

عادت إلى الواجهة قضية الوعود الكاذبة لي كايقدموها بعض المنعشين العقاريين لي كاياخدو تسبيقات مهمة من مدخرات الطبقات الوسطى باش يبنيو بها وفي الأخير كايحطو الكليان أمام الأمر الواقع.

الوثائق والصور لي توصلت بها “كود”، تتعلق بإقامة أوغيزون بارك في سلا الجديدة حيث تفاجأ السكان بعدم مطابقة الشقق التي سلمتها لهم مجموعة “سكني” العقارية مع اهم مواصفات الفينيسيون ديال الشقة النموذجية لي عرضاتها الشركة وواعدات الناس أنها غادي تبني ليهوم إقامة بنفس المواصفات وقالت ليهم أن كل شقة غادي تكون عندها بلاصة فالباركينغ.

“كود” هضرات مع بعض السكان لي خداو هاد البروجي واطلعت على ملف مدعوم بصور تبين بلي “ماكايناش بلاصة فالباركينغ تحت أرضي لكل شقة وشي بلايص خاص الا غادي تسطاسيوني فيهوم تكون شاد بيرمي ديال المساحات الضيقة، واتضح أن الشركة مادارتش داكشي لي واعدات به خاصة في ما يتعلق بالفينيسيون وجودة الخشب والماركا ديال تجهيزات المطبخ والصباغة ونوع الزليج.. مهم كولشي بالقوالب حسب الملف لي توصلت به “كود”.

وحسب مصدر “كود” فإن الشركة ناوية دير تفويت للباركينغات لي قدام هاد الاقامة والمساحات الخضراء ديالها للمجال العام، في حين قيل للسكان أنها ستكون اقامة مغلقة.

وقامت هذه الشركة بفرض الأمر الواقع لأنها تشترط على أي واحد أنهى إجراءات البيع مع النوطيرات (لي اختارتهم الشركة) أنه يوقع ويصادق في المقاطعة على وثيقة أو PV فيه بزاف ديال التخوفيش. ومايعطيوك السوارت أو اقادو ليك شي حاجة في اطار خدمة ما بعد البيع حتا كاتعطيهم هاد البي في لي كاتوقع فيه على أنك راض على حالة الشقة والمشكل أنهم حطو راسهم بلاصت القانون وطالبو السكان فهاد البيفي أنهم ما يكتبوش شي حاجة في وسائل التواصل الاجتماعي لي تقدر الضر بالشركة، أي أن المظالم ديال السكان تعتبرها الشركة مجرد اشاعة، حسب شهادات من عين المكان توصلت بها “كود”.

وتساءل أحد السكان: “ خاص الشركة تلقا لينا حل لأنها مادارتش نفس الفينسيون لي فالشقة النموذجية وقالوا أن كل شقة عندها بلاصة فالكاراج وعلاش كايرفضوا تسليم المفاتيح قبل التوصل بالبيفي لي كايحط الانسان أمام الأمر الواقع؟”.

وملي بغا واحد من الجيران ارفع لافتة في الواجهة ديال الشقة ديالو مكتوب عليها “زبون غير راض” تفاجأ سكان العمارة بواحد التراكس مطلعة عامل دار شرع ايديه وحيد اللافتة، بل تم توجيه انذار للناس لي علقو نفس اللافتة، وهادشي خلا أحد السكان يقول لـ”كود”: كنتساءلو واش دور السانديك (لي وضعاتو الشركة) هو توجيه انذارات عن طريق مفوض قضائي في تجاهل تام للحقوق الدستورية في حرية التعبير أم أن دوره هو الانصات للسكان وايجاد حلول”.

واتصلت كود بمدير التسويق، بواط فوكال لي كتجاوب، وتركت له رسالة نصية ورسالة فالواتساب شافها، حول الموضوع. كما راسلنا ايميل الشركة.

هاد القضية ديال الوعود المشبوهة بالكذوب لي كايعطيوها بعض المنعشين العقاريين، خاص تستنفر القطاع الوصي، لي خاصو اشكل لجنة لمراقبة مدى مطابقة الشقق النموذجية appartements temoins مع الشقق التي ستسلم ومايتعطاش حتا شي ترخيص بالبيع حتى يكون وفاء بالالتزامات، وذلك لتفادي اهدار الوقت والمال وكذلك تقليص القضايا المعروضة أمام المحاكم في هذا الشأن.

وحسب مصدر “كود” فإن هاد الناس لي شراو فهاد الاقامة عطاو تسبيقات من المدخرات ديالهم وثاقو فهاد الشركة فأوج ازمة كورونا وملي سالا لبني الشركة قالت ليهوم لي ماعجبوش الحال اتنازل واقلب فبلاصة اخرى. وكاين بند فداك عقد ديال ريزيرفاسيون كايقولو للناس لي تنازل غادي اديو ليه 5% من التسبيق. وهاد الشركة باعت للناس بحوالي 8000 الى مايناهز 10,000 درهم للمتر اي من اعلى الاسعار بسلا الجديدة.