وكالات //
بعد أيام من انتشار خبر ولادة الستار العالمية ريهانا (34 عام) لولدها اللول من المغني آيساب روكي (33 عام)، عدسات الباباراتزي شدات ريهانا فأول خروج ليها من بعد الولادة.
التصاور اللي انتاشرت على مواقع التواصل الاجتماعي، بانت فيهم ريهانا يلاه فالأيام اللولة ديال النفاس، فاش خرجات تسركل ف لوس أنجلوس، وكانت لابسة شوميز رمادية وسروال كحل. وقالت وسائل إعلام بللي صاحبها آيساب بقا فالدار مع البيبي.
ريهانا لحدود الساعة باقي ما بيناتش ولدها، ولا أكدات للإعلام الجنس ديالو، واخا أن مزال فالصحافة الفنية فميريكان كل واحد يلغي بلغاه.
ومعروف أن ريهانا كتعتابر مادة دسمة للإعلام ديال المشاهير فميريكان، وأخبارها كتحقق نسبة متابعات كبيرة على مواقع التواصل الاجتماعي.