عفراء علوي محمدي- كود//

قالت الممثلة المغربية مريم الزعيمي، بللي تعرضات لحالة ديال التحرش غير مباشرة فالدومين اللي كتشتغل فيه، لكنها وقفات المتحرش عن حدو وماعاوداتش تكلمات معاه أو تعاملات معاه مهنيا وإنسانيا، حتى فهم هو راسو.

وقالت الممثلة، خلال استضافتها فبرنامج “في مواجهة بلال مرميد” على قناة “ميدي1 تيفي” بللي ماعمرها تعرضات لحالة تحرش مباشرة، “وهذ الحالة كانت غير مباشرة، ولو أنها كانت مباشرة كنت نستعمل يدي قبل فمي ومانسكتش”، على حد تعبيرها.

وأضافت بللي مكانش يمكن ليها تجاوبو أو تتصرف بعد تعرضها لهذ التحرش، لأن هذشي كان ممكن يتقلب عليها، ويقول الشخص بللي ماقصدش وتصدق هي اللي غالطة.

وبالنسبة للتحرش فالدومين ديال التمثيل بشكل عام، كتقول الزعيمي: “كيتم منح ادوار لناس مكيستحقوش، لكن مانقدرش نأكد أن هذشي بسبب التحرش لأنني ماشفت حتى حاجة بعينيا، لكن التحرش كاين فكل بلاصة، فالزنقة والقهاوي والدار، والإنسان ماخصوش يسكت عليه وإلا فكيولي مشارك.

وزادت: “ممكن فالدومين كاينين ممارسات موسخة، وكاين محاولة الدق فالبيبان، وكاين اللي كيحل الباب، لكن باش يتهرسو البيبان ويكون دكشي بزز فماكنظنش”.