كود الرباط //
الليلة الجمعة 27 ماي 2022 بمركب محمد السادس بسلا زار رئيس الجامعة الملكية لكرة القدم فوزي لقجع لعابة الوداد البيضاوي.
تلاقى المدرب واللعابة بحضور رئيس الحمرا سعيد الناصري. طبعا الهدف من الزيارة هو يحفز اللعابة ويطلع ليهم المورال قبل ماتش فينال الشامبيانز ليگ الافريقية الاثنين الجاي فمركب محمد الخامس فكازا ضد نادي الاهلي المصري.
الاجواء كانت مزيانة وكلشي بان متحمس من لعابة الحمرا باش يجيبو للمغرب شامبيانز ليگ جديدة.
الوداد فهاد المدة كلها كان مركز على الماتش. ما دخلش فجدالات خاوية كيف دار نادي الاهلي المصري. ما شفناش شي خرجة من الحمرا ادارة تقنية او رئاسة. كلشي مركز على الماتش وصافي.
