تركيب كود//

رابط الحلقة 1

وقفات البنت  قدام عنصر الجوندارم وبقات كتهضر بالزربة، بكلام بالدارجة مخلط بكلمات بالفصحى كاتبين بلي البنت قارية، مافهم الجوندارم والو خصوصا وان نوبات البكا و تنفس صعيب كايخلي الكلام متقطع: ” اغتصبوني.. ختاطفوني.. الزيتون، الجبل…” ووسط هاد الكلمات اسماء ديال رجال ماغريبينش عليه، غالبا حيث دازو من لابريكاد من قبل بتهم سابقة ..

يالاه بغا يهضر و هي تسكت و تحيد الثوب على يدها و كشفات على رجليها..كانت يديها عامرة باوشام غريبة عجيبة منها علامة النازية و علامات معروفة كايدروها الحباسة ف ايديهم: نجمات خماسية و كلمة امي ورسومات بدائية و اسماؤهم و غيرها..الفرق انها علامات كانت كتدار ف الحيوط د الحبس او بيبان الطواليطات ف محطات الكيران او منعزلة كوشم ف اليدين ، قليل فاش تلقاها كلها مجموعة ف بلاصة صغيرة بحال يد رقيقة  ضعيفة ديال طفلة قصيرة ..

بحكم المهنة اللي كتخلي الواحد يشوف اسوأ مايمكن يخرج من البشر، و يشوف بزاف د الامور العجيبة وكتخليه يكون سريع ف الفهم و البديهة و تاحاجة مكتبقاش تصدمو، بسرعة خدا الجوندارم منها كناش الحالة المدنية اللي جابت معها… حيث هي مزال قاصر وماعندهاش لاكارط ناصيونال  فكرات بكل براءة ان باش تثبت هويتها خص تجيب معها الحالة المدنية..

سولها واش امها اللي على برا وقالت نعم، طل من الباب و قال ليها تدخل وكانت مزال واقفة و خايفة، الام و الاب اللي يالاه خرج من عملية جراحية كانو متخوفين اصلا من تقديم شكاية بحال كاع ناس المدن الصغيرة الفقراء ماعندهموش مع الصداع لا مع المخزن و لا الجيران لولا ان البنت كانت مصرة انها بغات حقها… تاحاجة مابقات كتخلعها بعدما داكشي اللي شافت وداز عليها.. وعد كانت قطعاتو على راسها انها ماغادي تخليهمش يفلتو بهادشي اللي دارو ليها و ماغاديش تسكت..

ف ظرف دقايق كانو كاع عناصر البريكاد مجتمعين مع لاجودان، ولكن واحد كايبقا غير يشوف و يحاول  يقرب يديه- وفنفس الوقت- مايمسش الاوشام و الجروح خايفين لايكونو مزال كايضروها ..قالت ليهم كاينين اوشام و جروح بالكارو كثار ف كاع جسدها…ورات ليهم رجلها و فيها وشم اخر بحال شي امراة مرسومة و علامات اخرى…

بقاو  كايطرحو اسئلة على راسهم وعلى البنت و الام وكايبقاو غير يشوفو ف اثار التعذيب.. وكل واحد كايفكر شنو السؤال اللي خص يتطرح اولا وفين يمكن تدخل كل حاجة تقالت ولا غادي تقال  ف المسطرة الجنائية و القانون الجنائي .. علاش ما جاش الاب؟ علاش ماجيتيوش البارح؟ باش دارو ليك هادشي؟ فين ..واش من بلاصة؟ اش من نهار؟  واش ف تيريتوار ديالنا ولا ديال البوليس ولا ديال جوندارم الاقاليم القريبة؟ واش نعرضوها على طببيب اولا ولا نستمعو للاقوال بعدا؟ وفين ساكنين انتما؟ واش هادشي اختطاف ولا تعديب ولا اغتصاب ولا كلهم ولا اتجار بالبشر وهو جريمة يالاه دخلات للقانون المغربي.. وكايتزاد التعقيد ملي كايعرفو بلي البنت قاصر أصلا..

تا واحد ماعرف منين يبدا ف كاع هاد الاسئلة و الاجراءات…شافو كلشي ف اللي يقدر يديروه الناس لبعضياتهم بسبب الطمع او الكبت الجنسي او حتى الغباء.. وهما تجاربهم كثيرة ف العمل  ولكن اول مرة يشوفو كمية الحقد و التعذيب المجاني  باين ف جسد صغير و اثار اللي ماعمرها تمحى.. ولكن مع اصرار  و شجاعة عجيبة كاتخرج من نبرات الصوت و النظرات ديال الضحية…

تاواحد ماعرفش منين يبدا من غير البنت اللي بكل صرامة بقات كتسنى من الجوندارم يجلس قدام البي سي باش يكتب اللي غادي تحكي ليه..