جنايات فاس فرقات 30 عام ديال السجن فجلسة وحدا على متهمين بـ”السرقات الموصوفة”
عمـر المزيـن – مكتب الرباط//
الفوضى فاش عايش نادي الكوكب المراكشي عطات ريحتها وحركات حقوقيون بمدينة سبعة رجال، وخلاتهم يرفعو دعوى قضائية باش يحاسبو المسؤولين على انهيار النادي، وهو المطلب لي كانوا بزاف ديال الناس من محبي الفريق كيطالبو بيه.
المعطيات التي وصلات لـ”كود” كتقول ان مجموعة من القرائن والخروقات غادي تجر عدد من المسؤولين الجداد و القدام للقضاء، من بعد ما تورطو في التخلويض لي خلا الكوكب تنزل للقسم الثاني وتمشي في طريق الانقراض بحال فريق مكناس .
ومن هاد لخروقات والمصائب الكثيرة، كنقول الشكاية لي وجهاتها الهيئة الحقوقية للنيابة العامة، ظاهرة الأرصدة البنكية الكثيرة لي عند النادي لضمان انجاز العمليات المشبوهة بتواطؤ مع مسؤول فأبناك، زيد عليهوم مجموعة من الشبهات فصفقات بيع اللاعبين والتحايل على الخبراء المحسباتيين، وتحويل الفلوس لحسابات بنكية شخصية وصفقات مشبوهة كثيرة.
الحقوقيون لي حركو هاد الملف من بعد مطالب كثيرة من الجمهور بالمحاسبة، كشفوا فالشكاية ديالهوم على بزاف ديال الملفات الخانزة لي غادي تجر القدام و الجداد للقضاء وممكن ترميهوم فالحبس ، خصوصا ان تواجد بزاف منهوم ماشي قانوني اصلا .
وماشي بعيد التحقيقات تجر بزاف ديال الاطراف من المخلويضين لي كانوا كيورطو النادي في صفقات مشبوهة باش يجرو النادي للقضاء و ياخدو تعويضات كبيرة كتشم فيها ريحة المؤامرات.