كود هناء ابو علي ///

البارح قالت مصادر ديبلوماسية فرنسية ل”ا ف ب ” باللي معدلات رفض التأشيرات” وسمعو العبارة “اللي كتروج فبعض وسائل الاعلام المغربية ومواقع التواصل الاجتماعي بعيدة عن الواقع”.

سفارة باريس كتكذب وهي اللي كتروج للكذوب ماشي وسائل الاعلام اللي بناها على شهادات لمواطنين عاناو من تعامل هاد الدولة المتعجرف.

سفارة فرنسا اضافت باللي “عدد التأشيرات التي منحت للطلبة المغاربة في فرنسا خلال (فترة) الدخول الجامعي لهذا العام تساوي تلك التي منحت العام الماضي” بلا ما يعطيو حتى شي رقم

علاش هاد الشي كذوب؟ اولا سفارة فرنسا رفضات لعشرات لمغاربة طلبة ومواطنين عاديين الفيزا. تصرفات بحقارة غير مسبوقة حتى مع اللي وصل لمطاراتهم. عقلتو على تصرف بوليسهم مع طبيبة قرات ففرانسا وكانت اول دفعة الطبيبات المغربيات. ولدها المدير السابق للمكتب الوطني للكهرباء يونس معمر كان رسل رسالة احتجاج راقية للرئيس الفرنسي ماكرون قبل اسابيع.

ففرانسا حصلت “كود” على شهادات لطلبة بداو قرايتهم تماك وضيقات عليهم باريس دون غيرهم. شهادات هاد الطلبة كتقول انو اول مرة فرانسا كيطلبو التسجيل عاد يمكن تجدد ليك السلطات الاقامة. فالسابق يحكي هاد الطلبة كان تجديد الاقامة تقريبا تلقائي. الطلبة اكدو ل”كود” ان هاد الشي كيهم غير لمغاربة. ما كيديروهش لا مع الجزائريين ولا مع التوانسة.

الدولة الفرنسية كانت واضحة فهاد الانتقائية. من نهار قررات تقلص عدد التأشيرات على الدول المغاربية٬ مشى ماكرون للجزائر وقال باللي غادي يرفع التأشيرات خاصة للطلبة وخرجات حكومتو بيان بالتراجع على هاد القرار اللي كيخص تونس. بوحدو المغرب بقى معني بهاد القرار. طبعا هاد الشي عندو جدور فالازمة المغربية الفرنسية.

الاحتجاج اللي دارتو البارح الجمعية المغربية لحقوق الانسان قدام مقر المفوضية الاوربية بحي الرياض فالرباط كان حدث مهم. هدرو فيه على ما يعانيه المغربي واعتبرات الجمعية فشعارات ولافتات “المنع من التأشيرة فعلا عنصريا تمييزيا”، و”احتقارا استعماريا”.

هاد الاحتقار كيعيشو اللي كيمشي فرحلات من المغرب لمطارات باريس. فرحلة عادية كان شي 10 من بوليس فرانسا قدام باب الطيارة تقريبا. تخرج وقبل ما تدخل للمطار كيكونو يتسناوك. طريقتهم حقيرة وفيها استعلاء فطلب الباسبور والتحقق منو. كيسولو الناس فين غاديين. يعني واخا كاع التضييقات واللي قدر ياخد فيزا٬ كتلقى بوليس كيسولك على فين غادي وعند من جاي.

تصرف فيه اهانة للمغربي للي جاي من المغرب. كيسولو غير مالين الباسبور لخضر والجنسيات الاخرى من افريقيا.

اذن تصريحات سفارة فرنسا فالرباط اهانة للمغاربة. حقاش كلها كذوب