عمـر المزيـن – مكتب الرباط//
[email protected]
نقاش كبير نايض على أسماء الولاة والعمال لي تعينو خلال المجلس الوزاري الأخير، الذي ترأسه الملك محمد السادس بمدينة مراكش. لحدود الساعة مزال مبانو أسماء هاد العمال والولاة بشكل رسمي وكاين بزاف دالهضرة خارجة على عدد من المسؤولين الكبار فالإدارة الترابية، سيما والي جهة فاس مكناس سعيد زنيبر لي قالي جابو مكانو معاد الجامعي ديال الجهة الشرقية.
هاد النقاش لي تبعاتو “كود” من البداية ديالو خلاّ القيل والقال بزايد. فمثلا والي جهة فاس مكناس الذي أكدت مصادر خاصة، لـ”كود”، أنه مزال فبلاصتو وماشي معني بهاد التعيينات، خرجات عدد من الجهات كتقول أنه مشا بحالو بسبب إدخال العاصمة العلمية في فوهة بركان. صحيح مدينة فاس تستحق الأكثر وكاين البطالة والاقتصاد مات والمعامل مسدودين لكن حنا كنهضرو على أمور مزال مبانت بشكل رسمي.
“كود” بغات تعرف وقتاش غادي تنقص الحدّة ديال الهضرة على العمال والولاة كولهوم، ودارت اتصال مع الناطق الرسمي باسم القصر الملكي، عبد الحقي المريني، الذي أكد أن “اليوم الأحد مكاين حتى شي حاجة”.
وأضاف الناطق الرسمي باسم القصر، في تصريح لـ”كود”، قائلاً: “أنا براسي غير كنتعلم ومزال معيطو ليا لكن غالبا سيدنا غادي يستقبل الولاة والعمال الجدد بداية الأسبوع الجاي، وربما الإثنين وربما الثلاثاء”.
