روينة نايضة ف الوداد البيضاوي على 24 ساعة من الماتش، لي غادي يجمعو بمولودية وجدة غدا الأربعاء بالملعب الشرفي بوجدة، برسم الدورة الرابعة من منافسات البطولة.
يوسف أشامي، المدرب المساعد لزوران مانولوفيتش، مشى بحالو اليوم الثلاثاء بسبب خلافه مع سعيد الناصيري، رئيس الوداد البيضاوي.
الخلاف كان بسبب بنودالعقد، لأن أشامي ما عندوش الكونطرا، وطالب من الناصيري تسوية هاد الوضعية. أشامي وباقي الطاقم التقني كانوا خدامين بلاكونطرات، كانوا كيدليوا غير بلاكارط ناسيونال أو الباسبور باش يكونوا في دكة الاحتياط.
الجامعة سمحات گاع للأطر التقنية، لي معندهاش العقود باش يحضروا الماتشات حتا للدورة الرابعة، ومن بعد غادي تلزمهم بالكونطرات.
يوسف أشامي رفض بنود العقد الجديد، لي اقترحو عليه سعيد الناصيري، وقرر يغادر الوداد قبل ماتش المولودية.
وسبق لي أشامي أن غادر منصبه في وقت سابق، إلا أنه عاد إليه مجددا بعودة التونسي فوزي البنزرتي، وبقا ف الوداد دون كونطرا حتا لدابا.