نجوى المالحي – كود //

نشرت المغنية رجاء بلمير تغريدة على حسابها الرسمي في تويتر انتقدت فيها الوسط الفني، وقالت انه بالنسبة ليها مجال عامر نفاق وحقد، وعبرت على رغبتها في أنها تخرج من الضومين باش تقدر تعيش كانسانة عادية بعيدا على الشهرة.

وكتبت بلمير في التويت ديالها :”كاين بزاف د الناس باغين الشهرة وكيصحبوها حاجة زوينة ولكن ماشيفينش الواقع المر والأشياء السلبية اللي فيها، تخيل يعايرك شي حد ومتقدرش تجاوبو حيث مشهور، تخيل يتعدى عليك شي حد بالهضرة فوجهك ومتقدرش تنزل لمستواه حيث مشهور، تخيل بعض الناس يفهمو تصرفاتك بالطريقة اللي باغين هما يفهموها بلاما يحاولو يحطو فراسهم أنه كاين سبب لكل تصرف، تخيل بزاف دالحوايج كيديرهم الانسان الغير مشهور كتكون عادية ولكن من الانسان المشهور كتكون خايبة، تخيل يبغي يجردك بعض المتابعين من شخصيتك حيث نتا مشهور والائحة طوييييلة”.

وتابعت :”الوسط الفني وسط موسخ عامر بالحقد والسم وكتوصل حتال اذية الناس فرزقهم وفحياتهم وهذا سبب من الأسباب اللي كيخليني بعيدة على كلشي تقريبا وصديقة للجميع ولكن من بعيد، حيث عشت مواقف صادمة بزاف من نهار دخلت للوسط، كنتمنى يجي النهار اللي نوقف فيه هادشي كامل ونرتاح حيث عيت من كلشي”.

pic.twitter.com/rSyh3S1RRP

— رجاء بلمير (@BelmirRaja) January 25, 2021