عفراء علوي محمدي- كود//

سجل المغرب، فالسيمانة اللي فاتت، 7700 إصابة بفيروس كورونا المستجد، أي بزيادة ديال 23,3 فالمية على مجموع الحالات، ووصل معدل الإصابات فكل 100 ألف نسمة هذ الأسبوع ل21 تقاس.

وكشف معاذ المرابط، منسق المركز الوطني لعمليات الطوارئ الصحية، فالحصيلة الأسبوعية الوبائية لفيروس كورونا، أنه كاين ارتفاع كبير حتى فحالات الوفيات، بحيث تسجلات هذ السيمانة اللي فاتت 116 حالة وفاة، أي بزيادة 23,2 لكل مئة ألف نسمة، بينما فالسيمانة اللي فاتت كانو تسجلو غير 69.

وقال المرابط أنه غير فهذ ال10 أيام ديال شهر غشت تسجلات 145 حالة وفاة، وهو رقم كبير عمرو تسجل فحتى شي شهر، بحيث أعلى نسبة دالناس اللي ماتو كانت فشهر أبريل اللي تسجلات فيه 134 حالة وفاة.

وكاين ارتفاع حتى فعدد الإصابات فكل 100 ألف نسمة وبوثيرة كبيرة ومقلقة، فبينما تسجلات فالأسبوع اللي فات 21 إصابة فكل 100 الف نسمة، السيمانة اللي فاتت كانت غير 14.

وأربع جهات هي اللي فيها أكبر نسبة ديال الحالات النشيطة، أي بمعدل اكثر من أو يساوي 30 لكل 100 الف نسمة، وهي جهة طنجة تطوان الحسيمة وفاس مكناس ومراكش آسفي وكازا سطات، بينما 3 جهات عندها بين 20 و10 لكل 100 ألف نسمة، وهي جهة الرباط سلا القنيطرة والجهة الشرقية وجهة الداخلة واد الذهب، بينما الجهات الخمس المتبقية أقل نشاطا، وهي جهة الشرق وبني ملال خنيفرة وسوس ماسة وكَلميم وادنون والعيون الساقية الحمرا.

والاختبارات فارتفاع مستمر سيمانة بعد أخرى للكشف على أكبر عدد ديال مصابي فيروس كورونا، بحيث هذ السيمانة تدار 154774 اختبار، بزيادة ديال 4,3 مقارنة مع الأسبوع اللي قبل.

وبالنسبة للوضعية الوبائية الوطنية على المستوى العالمي، المغرب طلع بجوج مراكز على مستوى عدد الإصابات عالميا، وكيحتل دابا المركز 58، وطلع ب5 مراكز على مستوى عدد حالات الوفاة ووصل 61، كيف طلع ب2 مراكز على مستوى عدد الكشفات وحتل المركز 33 عالميا.

على المستوى الإفريقي، المغرب كيحتل المركز السادس فعدد الإصابات، والسادس فعدد الوفيات بالتقدم بإصابة وحدة، والثاني على مستوى الكشوفات واللول فهذشي على صعيد شمال إفريقيا.