كود علي الصافي العيون ///

علمت “كود” أن ليلى أوعشي بنت الكوميسير لي دايْرا شرعْ يديها فالداخلة وكيتخلع الناس، دخلات فشراكة جديدة مع شريكها شي واحد اسمو مولاهم عبد العزيز السنوسي لي مُو هي نفيسة اليعقوبي ابنة الأميرة الراحلة للا عائشة، وكيوجدو لتشييد وحدة فندقية فاخرة على ضفاف خليج وادي الذهب.

وحسب المعطيات التي حصلت عليها “كـود” فإن ليلى أوعشي ومولاي عبد العزيز السنوسي دخلو شَركْة ففندق جديد غاتسيرو شركة سميتها “BORDER SHOP G”، غاينضاف إلى الفندق لي شاركين فيه بجوج لي هو “لاكريك الداخلة”.

وكانت التنسيقية الصحراية لملاك لكراير والأراضي الفلاحية بجهة الداخلة وادي الذهب وجهات شكاية إلى الملك محمد السادس، لانو تم تشييده على أول مقبرة بمدينة الداخلة، وجابو جرافة جرفت القبور فنبشت بعضها وعرتها، وردمت البعض الآخر، ودارو جدار ترابي بين المنطقة المجرفة وباقي المقبرة لتغطية النفايات المتراكمة الآتية من فندق “لاكريك”٬ كيف قالت الرسالة.

هاد الرسالة اللي عند كود نسخة منها قالت باللي هاد الشي غير تمهيد للاستيلاء على المقبرة.

ووفقا لذات المعطيات التي تتوفر عليها “كـود” فإن مولاي عبد العزيز السنوسي عندو 76 حصة من شركة “BORDER SHOP G” لي رقم السجل التجاري ديالها هو 1761 فيما ليلى أوعشي عندها 24 حصة من الشركة.

وكانت التنسيقية الصحراية لملاك لكراير والأراضي الفلاحية قد كشفت أن الشريكان المدللان في الداخلة ولي دايرين مابغاو ومكاينش لي يتكلم معاهم بحالا هوما فوق القانون، خداو أكثر من 10 هكتارات ذات الموقع الممتاز على ضفة خليج الداخلة والضفة الأطلسية، كما حصل السنوسي على قرابة 200 هكتار بالمجالين الحضري والقروي، وتقدر القيمة الإجمالية لها بـ7 مليارات سنتيم.