كود كازا //
بعد المصادقة على مشروع مرسوم بسن تدابير استثنائية لفائدة بعض المشغلين المنخرطين بالصندوق الوطني للضمان الاجتماعي والعاملين لديهم بالقطاع السياحي، أرباب شركات النقل السياحي والعاملين فالقطاع ماعجبهمش هذ القرار، وشافو أنه غير منصف ليهم بعدما عاناو الأمرين مع أزمة جايحة كورونا.
فتعليقو على القرار، قال محمد بمنصور، الكاتب العام للفيدرالية الوطنية للنقل السياحي التابع للاتحاد العام للمقاولات والمهن، أن المهنيين كانو كيتمناو القرارات الحكومية تجبر الضرر اللي تعرضو ليه، وتلقى ليهم حلول مع الابناك وشركات القروض اللي واخدين منها ديون مايمكنش تسديدها مع هذ الأزمة، الشيء اللي مخليهم على حافة الإفلاس، بينما كاين منها اللي دارو فاييت.
وزاد، فتصريحو ل”كَود”، أن هذ الديون، اللي تراكمات عليهم من نهار كَلسو من الخدمة منين بان فيروس كورونا هذي عام، وحتى دابا من بعد إغلاق الحدود فوجه مجموعة من الدول بسبب السلالات الجديدة، (هاد الديون) كتفوق باضعاف هد “الأجر الهزيل” الشهري ديال الدولة، واللي كيتحدد ف2000 درهم، وأن الأبناك فالمقابل مامعاتقاش.
من جهة أخرى، قال بمنصور أن 2000 درهم مايمكنش تسدد حتى القوت اليومي للمهنيين المثقلين بالديون، و أن هكذا الحكومة بينات على فشلها فالتعامل مع هاد الملف وحل أزمة صحاب التقل الطرقي.
