هناء ابو علي – كود//

نشر الصحفي الاسباني ايناصيو صمبريرو اللي كايتوصف بلي  متخصص ف الشأن المغربي مقالة على موقع” ال كونفيديونسييل” كايهضر فيها على غلق المغرب للممر التجاري  المغربي المطل على مليلية المحتلة  ففاتح غشت الماضي.

المقالة جا فيها ان الاغلاق ضربة قوية لاسبانيا و انها اخطر من ما سماه “اخذ” المغرب لجزيرة ليلى ف 2002 وقال ان الدولة المغربية كتضرب ف الزيرو اتفاق تعاون اقتصادي ديال 1959 و ان الرباط  بغات تخنق مليلية و سكانها اللي اغلبهم مسلمين كما استنكر ماوصفه بالصمت الحكومي الاسباني على هاد القضية.

و اضاف ان بزاف د المقاولات الاسبانية ف مليلية غادي تسد و غادي تزيد البطالة و استنتج ان المغرب مابقاش شريك فيه ثقة بالنسبة لاسبانيا وخا مزال كاتبادل الحكومات بلاغات الصداقة و التعاون.

وصف صمبيريرو ل قرار سيادي مغربي  باغلاق معبر فجانبه الحدودي  ومقارنته بما حدث مع صخرة ليلى خلا معلقين ف صفحته على الفايسبوك من صحفيين مغاربة و غيرهم من متابعين  يستنكرو نبرته و كلامه اللي كايحرض فيه الجيش الاسباني و الحكومة الاسبانية انها تدير كما درات ف ازمة 2002 ملي كان اليمين الاسباني دار حماقة و بغا يشعل الحرب على حجرة  كانو من ديما افراد د القوات المساعدة كايمشيو ليها  لمراقبة الهجرة السرية  و لولا الصبر و الحكمة   المغربية و التدخل الامريكي لكان جنرالات اليمين  ف الجيش نوضو روينة على والو.

صمبيريو اللي كايعرف شنو هو اختيار الكلمات بعناية كايملح و يحرض ف مقالته  زعما  باش يتدار رد عسكري و تساءلو المعلقين  واش السيد بعقله زعما ؟ مابقاش فيه الحياد و المصداقية المعهودة  فيه بل هضر كما اي قومي يميني اسباني نسبة ذكاؤه  ضعيفة ووقف التاريخ عندو ف حروب الاسترداد و داكشي ديال ايزابيلا الكاثوليكية و مزال متشبع بالعنصرية الاسبانية المعروفة ضد  المورو اللي مايتسهلوش  فنظرهم يديرو قرارات سيادية و تكون عندهم اصلا دولة، بعض المعلقين كتبو واش السيد بغا اسبانيا تدخل و تفرض تفتح معبر من الجانب المغربي بزز ولا كيفاش؟