كود هناء ابو علي ///

هاد العام كنمشي لكوسطا ديل صول وبالاخص بويرطو بانوس اللي عندي فيها ڤيلا على البحر. هاد العام ما غاديش نمشي. ما يمكنش نمشي لبلاد هاجماتنا وحارباتنا”. هادي كلمات لرجل اعمال بيضاوي ل”كود”. بحالو كاينين رجال اعمال معروفين وغير معروفين رفضو يمشيو يدوزو عطلتهم فجنوب اسبانيا كيف ديما.

الازمة بسباب استقبال مدريد لابراهيم غالي زعيم البوليساريو بحواز ديبلوماسي اسباني وهوية مزورة ف17 ابريل اللي فات قبل ما يفرشوهم لمغاربة. من بعد جات قضية سبتة وشوهتنا باش دخلو اطفال وقاصرين وكبار. ثم جا هجوم كبير لاسبانيا على لبلاد. خدمو حتى الاسلحة: اوربا وبغاو يمشيو حتى لميريكان باش تستحب اعترافها بمغربية الصحرا..

المغرب٬ باستثاء السماح لاطفال وقاصرين يدخلو لسبتة٬ وراهم العين الحمرا. عاقبهم. استدعى سفيرتو كريمة بنعيش ودار بناقص من عملية مرحبا باش دوز من اسبانيا.

جنوب اسبانيا هاد العام غادي ياكل العصا سياحيا. كان كيمشي ليه شي 600 الف مغربي. فيهم ملايرية كثار. هاد العام اكيد العدد قليل. المهم جزء من هاد لملايرية ما باغيش يخسر فلوسو فدولة كتهاجمنا.

احد لملايرية قال ل”كود” “كنمشي انا وعائلتي. بعض المرات كندوزو شهر. ايلى كان عندي شي غرض كندخل للبلاد ونرجع. عندي دار كبيرة شاريها بشكل قانوني. هاد العام ما غادي يمشي حتى شي حد منا. ما يمكنش بلادي تشوهات من قبل الصبليون وانا نمشي نعطيهم فلوسنا” يوضح رجل الاعمال اللي كيخدم فقطاع الخدمات فكازا.

كاينين حتي مسؤولين سياسيين كان عزيز عليهم يدوزو عطلتهم فاسبانيا: قريبة ثقافيا وجغرافيا. هاد العام “اوهو”. ماشي على الانتخابات ابدا: موقف مني بحال اي مغربي من عداء هاد الحكومة لبلادنا” يشرح احدهم ل”كود”. هاد المسؤول كان كيكري لولادو وليه فاوطيل فوينخيرولا وكيدوز 15 يوم عطلة. هاد العام كيقول “ما يمكنش نعطي درهم واحد لدولة تصرفات معانا بوقاحة. تصرفات كعدو ماشي كشريك فقضايا كبيرة كالهجرة والارهاب”.

كاينين حتى مدراء مؤسسات كبيرة فالقطاع الخاص او القطاع العام ومسؤولين فقطاعات بحال القضاء او محامين او رجال اعمال من كاع الدرجات عزيزة عليهم اسبانيا او جنوب اسبانيا. هدرات “كود” مع عينة منهم. كلهم “ما نحطوش رجلينا فهاد البلاد حتى ترجع العلاقات معاهم الى سابق عهدها.

هاد الشي غادي يضر السياحة فكوسطا ديل صول. فحسب مسؤول فميركادونا اللي كاينة فماربيا راه كيدير 70 بالمائة من رقم معاملاتو مع المغاربة فالصيف. المغربي كيمشي يدير السياحة وكيجيب معاه ماعن وحوايج الدخول المدرسي وامور كثيرة. يعني ماشي بحال عينة من السياح الاوربييين اللي كيجيو مخلصين اوطيل والمالكة من بلادو.

كاينة عينة من لمغاربة عندهم الامكانيات وعايشين فهاد المنطقة. حتى هما شي وحدين فيهم دخلو لبلادهم “كنفضل ندوز عطلة فبلادي. نخسر فلوسي فبلادي على نبقى تماك. عندي مشاريعي تماك ولكن مع الازمة قررت ندور عطلتي فالداخلة مع ولادي. غير فتحو الحدود نهار 15 دخلت لكازا ومنها نمشي للداخلة” قال احدهم ل”كود”.

ولكن ماشي كاع هاد لملايرية عندهم هاد الوطنية وحب لبلاد. كاينين شي وحدين دارو فيها عايقين. عندهم ديور وفيلات فجنوب اسبانيا. مشاو حتى لفرانسا ومن بعد خداو الطيارة لمطار مالگا. هاد النوع نيتو ناقصو وغبي. على الاقل يكون واضح ويركب من كازا لمالگا. ثم تماك راه الدولة عندها عينيها. دولتنا اللي عرفات ان ابراهيم غالي دخل بجواز سفر ديبلوماسي وهوية مزورة ومخبي لاسبانيا غادية توحل مع ملايري تحايل باش يمشي لدولة دارت كلشي باش تضرب بلادنا؟ راه كلشي شايفو تماك

دابا اللي بغى يمشي يمشي. غير هو الاغلبية قررات دوز عطلها فالمغرب او دول اخرى. البرتغال مثلا. طريقة من الرد على موقف الحكومة الاسبانية. اما الشعب فعلاقتو مع لمغاربة مزيانة وغادية تزيان باش تمشي هاد الحكومة اللي كيقودها الاشتراكي بيدرو سانشيث بتحالف مع بوديموس اللي من اليسار الراديكالي. مع البوليساريو ومع احتلال سبتة ومليلية: شوفو على يسار