كود سبور//

كيعيش الرجاء الرياضي أزمة مالية خانقة من أسبابها عجز رئيس النادي عزيز البدراوي على أنه يلقى حلول لها، والمشكل أن هذه الأزمة بدأت كتوصل لمستودع الملابس حيث اللاعبين كيتسالو مستحقاتهم.

مصدر مطلع، كشف أنه وقع مشكل بين شي لاعبين د الرجاء والكابيتان ديال الفريق أنس الزنيتي، حيث الأخير طلب من عزيز البدراوي رئيس النادي يصرف مستحقات اللاعبين الجداد والصاعدين هم الأولين، حيث ما يقدروش يصبروا كثر نظرا للظروف ديالهم.

تصرف انس الزنيتي وحسب نفس المصدر، ما عجبش شي لاعبين آخرين، وكاين فيهم اللي تناقش مع الكابيتان ديال الفريق اللي مكلف بالتنسيق مع البدراوي حيث طلب منو يسبق اللاعبين اللي محتاجين أكثر من البقية.

للإشارة فالرجاء الرياضي كيعاني ماديا بشكل كبير، والفربق في عهد الرئيس الحالي عزيز البدراوي كيلقى مشاكل حتى فالسفر باش يلعب خارج المغرب عصبة أبطال إفريقيا، وكيديبلاصا فرحلات عادية حيث البدراوي عاجز على أنه يوفر طائرة خاصة للفريق، بالإضافة إلى أنه مازال ما وجد حل للمستحقات د اللاعبين باش يصرفها لهم كاملين.