سهام البارودي – كود//

زوين مسلسل بنات العساس ! تفرجت فالثلاتة د الحلقات الاولى و بالرغم من أنه فيه بعض الهفوات و الثقالة فالمشاهد و لكن لي حتى واحد ماغايقدر ينكرو انه فيه بزاف ديال الممثلين اكفاء: سعاد خيي، منى فتو ، عزيز حطاب …! انا شخصيا عندي احترام كبير لمنى فتو كممثلة بدعات فأدوار كثيرة  و القصة ديال المسلسل لحد الساعة كاتبان مغيزة…
ولكن علاش جايبين لينا منى فتو و دنيا بوطازوط فدور مراهقات ؟! واش ماشي استخفاف بعقل المشاهد هذا ؟! منى فتو عندها خمسين عام و بوطازوط ربعين عام مايمكنش يبانو مراهقات ! و ماشي الگصة و الگرينات لي غايجعلو منهم مراهقات حيت لا فورمتهم ! لا وجوهم ! لا هضرتهم تاحاجة فيهم ماكادل على انهم مراهقات و لا شابات فأوائل العشرينات ! فماكاينش لاش تجيبوهم فهاد الادوار حيت عوض يبانو مراهقات ولاو كايبانو متخلفات عقليا ! عيالات بقدهم بقامتهم ! شخشات كولا وحدة يا وحدة  توقف حداك ضرگ عليك الشمش و كاينقزوا و كايلعبو و كايعوجو هضرتهم فحال شي بنيات صغيورين راه كايبانو حمقات ! مسطيات !

ثم واش حنا كمشاهدين حمير آ سي المخرج ؟! خاصنا نتفرجو فيهم و نتيقوا بيهم ! نتيقوا مثلا انه دنيا برطازوط ” في سن صعيب” فحال لي قال الممثل لي مثل دور شاف كويزيني و هي كاتبان قدو فالسن !

خاص نتيقوا بلي منى فتو بنت العساس و بلي مرات العساس مها و هوما من نفس لاجينيراسيو ! هادو راه ماشي بنات العساس ! هادو عيالات العساس ! خواتاتو!