كود كازا ///
كلشي كيقلب سواء باغيهم يخرجو او ما كرهش يبقاو فالحبس. واش هادوك 5654 سجين اللي عفى عليهم الملك محمد السادس هاد اليوم فيهم الزفزافي وصحابو من زعماء حراك الريف والصحافي توفيق بوعشرين؟
الجواب جا بشكل واضح فبيان وزارة العدل اللي علنات على العفو. سدات الباب وقالت باللي معايير العفو هي “معايير إنسانية وموضوعية مضبوطة”. اش هاد المعايير؟وزارة العدل قالت اولا سنهم. يعني يكونو كبار وهادي ما كتوفرش عند لا بوعشرين لا الزفزافي وصحابو. زائد السن كاين “هشاشة وضعيتهم الصحية” ثم مدة اعتقالهم” عاد حسن السيرة والسلوك”.
هاد الشي كولو خاصو يكون. حسن السيرة والسلوك كيدخل فيها لقراية ديالهم وتعاملهم فالحبس..
تقدر تكون الهشاشة تكون عند معتقلين بحال بوعشرين اللي عندو وضعية صحية ولكن مدة الاعتقال اي خاصهم يدوزو 3 ارباع المدة ما كتوفرش لا عند صحاب الريف لا عند بوعشرين.
بالنسبة للصحافي حميد المهداوي يقدر يكون عندو هاد المعايير. ناس حراك جرادة حتى هما يقدر يكون عند بعضهم هاد المعايير بالاضافة الى بعض معتقلي حراك الريف ولكن ماشي الزعماء، اللا الناس العاديين اللي تحكمو بمدد قصيرة.
