كود هند لكلاوي مراكش ///

مشاهد كتقطع القلب واقعة لمغاربة حصلو فتركيا. عايشين شي وحدين فمطار اسطمبول. من نهار قررات الحكومة تغلق حدودها الجوية وحتى البرية وهما حاصلين. القرار كان معقول ومنطقي بالنظر لظهور “اوميكرون” المتحور الجديد ديال كورونا فيروس. منظمة الصحة العالمية قالت باللي خطير وسريع الانتشار. المغرب قرر يدير “الوقاية” حقاش عارف نظامو الصحي على قد الحال وما يقدرش يصمد ايلى ارتافعات الحالات اللي كتدخل للانعاش بسباب هاد الڤيروس.

هاد القرار سبقاتو ليه اسرائيل وتبعاتو اليابان. غير المغرب تصرف باهمال كبير لمواطنيه. اسرائيل واليابان مفروض عليها دخل ناسها فاقرب فرصة فرحلات استثنائية ولكن يتفرض عليهم “لاكارنتين” ويديرو التسيت فالمطار ويعاودوه بعد عشرة ايام قبل ما يمشيو فحالهم.

فالحالة المغربية كلشي مرتجل فتدبير هاد الملف. تسنينا من الاثنين حتى لخميس عاد خرجات الحكومة من خلال الناطق الرسمي ديالها مصطفى بايتاس باش تقول راها غادية دير رحلات اسثنائية باش ترجع لمغاربة اللي حصلو. ولكن ما قالش وقتاش تبدا هاد الرحلات ولا من اية دولة غادية تبدا.

شهادات مواطنين حصلو برا ل”كود” قاصحة. كوبل حصل فتركيا وتقطعات بيه لحبال وعايش مع شي مغربي اخر فدار مزاحمين. هاد الكوبل راه محظوظ بزاف. تصورو راه مازال عشرات المغاربة فالمطار عايشين فيه. ساكنين فيه. تكرفيصة خايبة بزاف لهاد الناس وشوهة كبيرة طبعا للمغرب.

واش خاص فالدستور المغربي يكون فصل واضح فيه ان كل مغربي حصل برا خاص بلادو ترجعو باية وسيلة باش هاد الناس يرجعو لبلادهم. شوفو الدول الاخرى٬ يستحيل يبقى شي مواطن برا. ايلى زغب شي حكومة دارتها تنوض ليها المعارضة. يولي نقاش فالمجتمع.
وقعات المرة الاولى مع حكومة بنعرفة وخلاو لمغاربة مشردين لاشهر. دابا دازت سيمانا علاش ما تعلن والو.

شوفو الدول الاخرى كيفاش دايرة رحلات اسثتنائية باش تخرج مواطنيها من عندنا. علاش ماشي نفس الرحلات تمشي تجيب هاد المغاربة اللي عالقين فاوربا واسيا وامريكا وافريقيا. هاد اوميكرون راه لقاوه فالصبليون فمواطن ما عمرو كان عندو اتصال بشي حد جاي من جنوب افريقيا. وكانت حالات فهولندا بانت قبل ما يتعرف فجنوب افريقيا. يعني خاص الحماية ولكن ماشي تسدو لبلاد فوجه لمغاربة.

هاد المغربي اش دنبو هادي عامينو وهو كيعاني٬ يمشي للخارج لسبب من الاسباب ويبقى حاصل.

ثم واش عندنا لفلوس كافية باش لارام” الخطوط الملكية المغربية تعيش ازمة اخرى؟ ازيد من 50 طيارة واقفة دابا. غادية تدي شي اجانب حاصلين لفرنسا واسبانيا وبلجيكا وتركيا وترجع خاوية. علاش ما تجيبش لمغاربة وتدار الاجراءات الوقائية. يجيبو “بي سي ار” 24 ساعة صافي وباش يوصلو يديرو تيست فالمطار ويديرو ليهم كاع لاكارنتين بحال كيف دارت اسرائيل ولكن يكونو فبلادهم. حتى ايلى عندهم شي فلوس يخسروهم هنا. فبلادهم.

خاص هاد لمغاربة يرجعو اليوم قبل غدا. كاين شي ديستيناسيون ما مفهومش كاع علاش مازال ما دخلوش. مثلا لمغاربة اللي حصلو فلاس بالماس وساكينين فالعيون. كنعرفو الساكنة تماك ما كتمشيش سياحة. كتمشي عند الطبيب وعند العائلة. مادام لاس بالماس ما فيها حتى حالة من هاد “اوميكرون” علاش ما تكونش رحلات استثنائية باش يدخلو هادو لبلادهم. لديورهم. بعض القرارات كتكون عندها تبعات على السيادة المغربية. تصرفات طائشة كتكلفنا بزاف. هاد الشي اللي واقع اليوم فهاد الرحلات.

باراكا من هاد الاستخفاف والاستهتار بالمغاربة. هادو راهم كيشوفو كيفاش غاديين تجيبو مسؤولين من مدريد غدا وغاديين يخليو مواطنين اخرين مرميين. خاص التحرك اليوم قبل غدا