كريم الشركي-كود///
حرب كبيرة فالصبليون بين اسبانيين من اصول مغربية. شي وحدين كيعتاقدو انك ايلى دافعتي على البوليساريو غادي تكون مواطن صالح فهاد البلاد. أي واحد كيدافع على البوليساريو كتعتابرو الطبقة المثقفة ديالهم أنه مناضل، ديكشي علاش كتلقى بزاف ديال الفنانين والصحافيين ومشاهير اسبانيا كيستغلوا هاد القضية، ومنهم خابيير بارديم الممثل الاسباني.
هادشي شجع واحد المغربية سميتها مريم حاطيبي، كانت ناطقة باسم مؤسسة ابن بطوطة فكتالونيا اللي كيرأسها نسيبها محمد الشايب البرلماني السابق في البرلمان الاسباني. ولد الشايب مزوج بهاد المناضلة ديال الساعة 25.
هادي اللي تزادت فالعرايش وولات ناطقة باسم الريف وباسم الصحراء٬ تشجعات تا هي تركب على القضية باش ترجع مشهورة، وحسب وسائل اعلام اسبانيا أنها كتستغل هادشي باش تدخل لبوديموس ودير البوز.
السيدة قالت بأن الشعب الصحراوي كيعيش مأساة، وهاجمت المغرب، ودعمات البوليساريو، هادشي خلا الجالية المغربية فطتالونيا تهاجمها بشكل كبير، وعتابروها وصولية، وغير باغية الشهرة، ومايمكنش تكون هادي ممثلة للجالية المغربية كيف كتقدم راسها.
السيدة كادير آراء لي ديما تخليها محبوبة من الرأي العام الاسباني، يعني الأمر ماعندوش علاقة بقناعة تحديد مصير الشعوب أو شي حاجة بحال هكا، ديكشي علاش هاد السيدة بلعات لسانها بشكل تام فقضية استقلال كتالونيا، بل كانت كتدعم اسبانيا ووحدتها.
بعد ما هاجموها مغاربة مناضلين فاحزاب انفصالية فكاتالونيا ولكن مع مغربية الصحراء٬ ناضت دارت بيان اخر اكثر حقارة فيه باللي كمغربية باغية تعيش فالسلم ولكن ما عتاذراتش على حتى كلمة قالتها ضد بلادها. هي عارفة باللي ما عندها قيمة الا اذا كان عندها شي حضور عند لمغاربة من اصول اسبانية. باغية ترشح للانتخابات ولا شي تخربيقة ولكن تحتاج اصوات هاد لمغاربة لهاد السبب دارت اعتذار اللي هو فالحقيقة تأكيد لكلامها. هادي مريم حاطيبي قطعات مع للي من اصول مغربية وعندهم الجنسية الاسبانية.
