نجوى المالحي-كود//
هاد اليوماين كيتعرض الكوبل المعروف “أمين وصوفيا” لحملة ديال السب والشتم والاتهام بالديوثية فقط حيت الراجل حط فيديو مع مراتو وهي حاملى ولابسة المايو.
شي متخلفين ومدعششين كتبو تعاليق كيعيرو فيها الزوج وكيقولو ليه “**مل” وشلا هضرة أخرى لي دون المستوى وماعندهاش بلاصتها لا في الافتراضي ولا في الواقع.
الكوبل حر في اختياراتو ولي معجبو حال يمكن ييبلوكيهم كاع ويهني راسو، علاش هاد النوع ديال بنادم كيحس ديما انه من حقو يتدخل في الحياة ديال ناس اخرين، ويفرض عليهم التدعشيش ديالو، وطريقتو القروسطية في الحياة؟
واصلا كيعرف أمين وصوفيا من سنوات غادي يتأكد ان هادشي ماشي جديد وأنهم كوبل متفتحين وعايشين حياتهم كناس من القرن الـ21 ماشي رجل ومرأة الكهف.
