كود هناء ابو علي ///
شي عينة من لمغاربة كل نهار حاضيين غير خوتهم. كيسبوهم. كيعيروهم. كل نهار فصفحات التواصل الاجتماعي حاضيين ولاد الشعب. كيحملوهم مسؤولية كاع اللي كيوقع فقضية الحجر الصحي. ايلى طلعات الحالات شي نهار كينوضو يكتبو خاص الدولة تنوض ليهم ويواجهوهم بصرامة وبقوة كاع. يعني ناش كيأمنو بدولة الحق والقانو وكينظرو ليها وفهاد ليام ولاو منظري القمع ضد الشعب. كيشوف فيديو ديال مغاربة فسوق فحي شعبي كينوض يحرض الدولة تخرق القانون ويتعادو عليهم بالعصا.
هاد بنادم خطير على لبلاد. مضرين ليها. فحادثة اعتداء جوج مخازنية علي نائب وكيل الملك بطنجة ناضو كيقولو وهما قاريين وفاهمين: علاش ما قدمش نائب وكيل الملك راسو وعطاهم لاكارط ناسيونال. اييه يا الاغبياء. انتوما مع دولة الحق والقانون انتوما؟ اولا كتعرفو باللي لمخازنية اصلا ما خاصهمش يكونو بوحدهم. ديما مع القايد او مع البوليس. والاهم من هاد الشي هادوك لمخازنية دارو خرق اخر للقانون وخطير هو انهم ما عندهمش السلطة الضبطية. ما من حقهمش يطلبو من شي مواطن البطاقة ديالو. النقاش كان يكون فهاد النيفو ماشي فالجهة اللي مشاو ليها.
لمغاربة كيخرجو. اييه بحالهم بحال دول العالم. شفنا فالمانيا خرجو احتجاجات كيطالبو فيها هاد الناس الحق انهم يتعاداو بالفيروس. هادو مشاو بعيد. فميريكان ولايات كثيرة دارت عصيان وكانت ضد الحجر. خرجو للشارع.
فاسبانيا ولات احتجاجات بالكاسرونات كل نهار ضد الحكومة. ماشي غير هاد الشي. هادي جوج سبوتا فمدريد بوحدها دارت 400 قصارة كلها شراب ونشاط.
المغرب ما دارش هاد الشي. اللي خارجين باغيين يتقضاو. ما تقولش لي يحتارمو المسافة ووو كيفاش تحتارم مسافة فسوق كاين فزناقي مضيقين.
ثم المغرب مقارنة بهاد الدول اللي ذكرنا راه ما فيه والو. حنا يا اللي كيسبو لمغاربة مازال ما وصلناش 7 الاف حالة والوفيات مازال ما وصلناش 200. اسبانيا هادي يومين لاول مرة نزلو علي 100 وفاة فالنهار. مائة قتيل. فاتو 27 الف قتيل وفاتو 231 الف اصابة. هادو راه مسموح ليهم فمناطق يسافرو ويخرجو يتمشاو فالبحر ويديرو الرياضة ويتقضاو. ايلى درنا مقارنة فالمغرب راه خاصنا نطلقو اللعب.
المغرب خاصهم يزيرو حتى يفوت والعيد لانو ممكن يخلي الحالات تكثار ولكن بلا ديك الهدرة ديال راه الاحياء الشعبية ما كتحتارمش الحجر الصحي. كيفاش تطلب من مواطنين عايشين فبيت او جوج بيوت وهما كثار وكان فحالات منهم صالونهم هي القهوة اللي فالدرب فيها كيشوف الماتشات والافلام وكيكمي وكيمشي حتى للطواليت. يعني صالون دارهم اللي ما عندهمش. زائد ان نسبة كبيرة من لمغاربة مدورين الحركة فالاقتصاد غير المهيكل. لقاو ريوسهم بلا مورد رزق بلا دار تحمر لوجه فين يعيشو
هادو وللي عايشين فالكاريانات راهم متحضرين بزاف وصبارة بزاف مقارنة بشعوب دول اخرى. وباراكا من جلدهم كل نهار.
