عفراء علوي محمدي- كود//
بتنسيق مع السلطات الإقليمية فأكادير، تكلف حسن الزيتوني، عامل عمالة تنغير، بترحيل 104 طالب بقاو حاصلين فجامعة بن زهر فأكَادير لعند عائلاتهم فإقليم تنغير.
العامل استجب لنداء العشرات من الطلاب اللي طلبو منو باش يلقى ليهم شي حل، على اعتبار أنهم تكرفصو بزاف فأكادير، وأن حالة الطوارئ اللي نتجات عن انتشار فيروس كورونا المستجد حالت دون رجوعهم لديورهم.
الطلبة رجعو اليوم الجمعة لتنغير على متن 6 دالكيران، وخضعو للتحاليل ديال فيروس كورونا المستجد، اللي خرجات كلها سلبية، وتبين انهم فصحة مزيانة.
وبهذ المبادرة، اللي لقات استحسان كبير من طرف الساكنة، كيتعتبر عامل عمالة تنغير هو أول عامل فالمغرب اللي تحمل مسؤوليتو ورجع الطلبة لعائلاتهم، ومازال غادي يدير مبادرة أخرى باش يرجع طلبة تينغير اللي حصلو فمراكش.
وللإشارة، فمجموعة من البرلمانيين والمنتخبين فالإقليم حاولو يركبو على هذ المبادرة، بغرض استغلالها فالحملة الانتخابية المقبلة، لكن فالواقع ماكتربطهم بيها حتى صلة..
