محمد سقراط-كود///
“من نقل إنتقل ومن إعتمد على نفسه بقي في قسمه”، أول حكمة كتعلمها في المدرسة العمومية، فاللول كتكون ضحك ومن بعد كتولي معقول، وحاليا ولات حق مشروع، التلاميذ ولاو يخرجو كاعيين من الإمتحان وساخطين على الأساتذة حيت مخلاوهمش ينقلو، وكيحسو بالأمر بحال الى شي مؤامرة خاصة ضدهم، وأن هاد الأساتذة كيكرهوهم ومحرضاهم الدولة عليهم باش متخليهمش ينقلو وينجحو ويمشيو بعيد في حياتهم كنقالة محترفين، الغش ماشي شي حاجة لي مكروهة إجتماعيا بل العكس كتعتابر قفوزية وذكاء، أي واحد يربح شي حاجة بلا مايستحقها وبلا مايبدل مجهود كبير عليها وبلا مايسلك الطرق الشرعية باش يوصل ليها راه قافز وذكي وولد الوقت، وكيضحكو على هادوك العاديين لي كيضربو تمارة باش يوصلو للحاجة كيتسماو غير دمادم.
بزاف ديال الرحالة والأدباء والمفكرين والمستغربين لي كانو زارو المغرب ودونو الزيارة ديالهم وصفوا بعض الفئات ديال المغاربة بقلة النية والغش وبلي خاصك تحضي راسك منهم وللى غادي يخوروك، وحاليا هاكة كنعيشو حنا كمغاربة تبغي تمشي عند ميكانيك خاص تحضي معاه وتمشي عند شي حد معرفة باش مايغشكش، معلم بناي زلايجي نجار أي حرفة وأي حاجة غادي يقضيهاليك شي حد، خاص تحضي معاه لأنه قليل بصح لي كيخدم بنيتو خدمة نقية ، وطبعا داك لي كيخدم خدمة نقية راه سمعتو كتخدم عليه من بعد ولكن في الغالب مكاين غير كور وعطي للعور، أصلا الحرايفية فأي حاجة فالمغرب راهم قلال أي مهنة فيها المتطفلين والغشاشة كثر من الحرايفية الحقيقيين.
كاين واحد الفيديو ديال المعلم الكناوي حسن حكمون لي عايش فميريكان سولوه شنو الفرق بين ميريكان والمغرب؟ عطاهم جواب بسيط ولكن كيلخص كلشي، قاليهم” هادي بلاد القانون مكاينش داك تكون واقف فالصف ويجي واحد يفوتك هنا كولشي سواسية قدام القانون”. هنا حتى داك المغربي النزيه لي محتارم القانون نهار تجيبو الوقت فشي ورقة فالإدارة فيها الطلوع والهبوط وشدان الصف فراه الى عندو شي معارف يجنبوه التمرميد كيخدمهم وحتى هو الى لقى كيفاش يتجنب الصف بالوساطة كيتجنبو، هادشي ساري بيه العمل بنادم غير فالسطوب كيجي من الجنب ويوقف قبالتك/ وفاللخر تلقاه حتى هو مفقوص على أحوال شباب اليوم وكيفاش القيم والأخلاق ديالهم انحطت ووللى عندهم الغش عادي، واراه الأغلبية هاكة كبير وصغير.
