كود سبور//

كيواصل عزيز البدراوي رئيس الرجاء الرياضي إثارة الجدل، وهذه المرة خرج يفسر السبب وراء دخوله فمشادات كلامية مع واحد من جمهور الفريق البارح فالتيران فماتش الفريق الأخضر واتحاد التواركة.

عزيز البدراوي قال فانستغرام: “الرجاء اليوم محتاجة أكثر من أي وقت آخر لجماهيرها، حتى تلقى التركيبة والتوازن المفقود اللي كتقلب عليه، ما محتاجاش الشمكارة ديال لخلا”.

وأضاف الرئيس ديال الرجاء: “واحد جاي مقرقب ملي دخل وهو كيسب فاللاعبين شي سبان ما فيه ما يتسمع فملعب صغير مدرجاتو قريبة من رقعة الملعب”.

البدراوي مع مرور الوقت بدأ كيفقد الصبر وقال: “فرع لينا ودنينا لمدة ساعتين ما شجع فرقتو ما هننا بسكاتو، بحال هاذ النوعية من الجمهور “زبانية صاحبنا” غي بناقص منها، .في لحظة غضب مني عصبني مشيت عندو نوريه التشجيع كيف كيكون ولكن لمن كتعاود زابورك يا داوود”.