26/04/2024 08:00
قفروها الكابرانات على لالجيري: القضية ما فيهاش غير 3 لزيرو.. خطية قاصحة كتسناهم بسبب ماتش بركان والمنتخبات والأندية الجزائرية مهددة ما تلعبش عامين
كود سهام البارودي ////
بزاف د الناس كايحاولو يصورو الارهابي على أنو واحد السيد فقير ماعندوش ! ماقاريش ! لعبو ليه شي وحدين براسو و “دارو ليه شي دغل فالحليب” و سيفطوه يطرطق فشي قنت فالكرة الارضية ! ماشي بالضرورة حيت بزاف ديال المزاليط مامستاعدينش يتفركعو بغاو غي الفلوس و الله يسامح فالجهاد و بزاف ديال لي ماقاريينش تاهوما طالبين غي التعادل و الجهاد الوحيد لي كايعرفو ليه هو الجهاد على طرف د الخبز!
الارهابي هو واحد السيد كايقلب على البطولة بالدرجة الاولى انسان عند بالو هو على حق و الآخرين على باطل و الله مكلفو ينزل الحق و الشربعة فالارض! انسان كايتخايل راسو هو خالد بن الوليد ديال 2015 !… سيف الله المسلول ! المهمة ديالو فالارض اكبر من أنو ياكل و يشرب و يخدم و يولد الولاد ! لا الارهابي واحد الانسان كايشوف راسو عندو مهمة اكثر قداسة من انه يعيش حياة عادية ! يختارع دوا المالاريا و لا يكتاشف شي كوكب جديد …
الارهابي كايشوف راسو جندي من جنود الله في الارض ! المهمة ديالو هي احياء امجاد المسلمين ديك الامجاد لي كايهضرو عليها فالكتوبة د التاريخ !كايحس براسو مكلف بمأمورية من عند الله ! خاص كاع الناس يسلمو! خاص مايبقاوش ليبواط و نحاربو الفسق و الفجور و الطاسة و البنات العريانات و دوك مظاهر الانحلال … ايه شحال من واحد كايهضر بهاد الطريقة اليوم فالمجتمع و باغي يحارب داكشي لي كايسميه هو الفسق و الفجور و لكن ماقادش حيت الله يعز صحاب الحال و عكاشة و علي مومن و العادر و السانطرال ديال القنيطرة ! “من رأى منكم منكرا فليغيره بيده او بلسانه او بقلبه فذلك اضعف الايمان” ، الارهابي هو واحد السيد قرر يغير المنكر بيديه ! يهز كالاشنيكوف و يتيري فبنادم كايشرب الشراب فبار و لا فجماعة ديال البنات و الدراري كايشطحو فشي سبيكطاكل ديال الروك …
الارهابي هو هاداك لي مابغاش اضعف الايمان ! لا بغا يبدل بيديه…بغا يطبق داكشي لي كايبان ليه هو الصحيح و هو لي خاصو يكون و ماشغلوش واش الناس باغيين و لا لا ؟ واش الناس متافقين معاه و لا لا ؟ الحقوق و الانسان و الحرية و المساواة داكشي ماداخلش ليه لراسو الارهابي واحد الانسان كايشوف راسو مكلف برسالة سماوية من المنظور ديالو راه ماغالطش ! راه بصح كايدير خير فالبشرية حيت غايرد الناس لطريق الله ! و ماشي مشكل دوك الرويحات لي غايطيحو فسبيل هاد الرسالة السماوية ..
نفس القضية اليوم كانشوفوها فالمجتمع عند شحال من واحد كايحاول يفرض الرأي ديالو حيت عند بالو راه مكلف من عند الله ! مكلف انو يحجب العيالات ويلبسهم على هواه، مكلف انو يحارب داكشي لي كايشوفو منكر، مكلف انو يحيح لاشاف جوج بنات لابسين صايات ! مكلف انو يضرب ممثلة و يخلي دار بوها حيت مثلات دور ماعجبوش ففيلم … حتى هادو ارهابيين ! حيت الارهاب ماشي بالضرورة تهز كالاش و تيري فالبشري ! الارهاب ماكايتسماش ارهاب حتى
يسيل الدم ، حتى انك تحاول تفرض القناعات ديالك على الناس راه ارهاب ! تفرض عليهم شنو ياكلو و شنو يلبسو و اشمن ديانة يدينو بيها راه نوع من انواع الارهاب غي هو حيت ناشف مافيهش الدمايات الناس كايتجاهلوه و و يسكتو ليه في انتظار يتطور واحد النهار … نهار تنوض الفوضى و تولي عندو ديك القوة لي ماعندوش اليوم.
