كود الحسيمة ////

طريقة تواصل وزارة الداخلية عهد عبد الوافي لفتيت كتحيي تصرفات ما يمكنش ليها تصمد زمن وسائل التواصل الاجتماعي. طريقة انتقاء لفتيت للصحف اللي مشات معاه للحسيمة كتبين عقليتو. اختارو شي 20 صحافي وصحافية. المشكلة ماشي هي هادي فاللي مشاو المشكل فالاقصاء.
السي لفتيت ما قال ليك حد دي صحافي من كود ولكن وزارة الداخلية ما وارتهاش على جدودك باش تختار اللي تبغي. كان عليك يا السي لفتيت دير اخبار باللي كاين لقاء وصحافي كود يجي بامكانياتو ماشي بامكانياتكم

الصحافيون لمساكن اللي مشاو تسخسخو مشاو ورجعو مع العشرة الليل ما باتوش وما كملوش جلسات التعذيب اللي تعرضو ليها الوزراء من قبل ناس الحسيمة وما سالات حتى لحداش ونص
مشكلة اخرى ان هاد العبقري اللي اشرف على الصحافيين قسمهم باش وصلو للحسيمة. شي مشى مع هاد لوزير وشي مشى مع لوزير لاخر. صحافي قال ل”كود” “وكانو تالفين ما عارفين والو. داونا باش يوريونا شي مشاريع الساعة عياونا بالدوران وما وراونا والو. لا سبيطار لا مدارس لا حتى حاجة”