عبد اللطيف اگنوش، استاذ باحث جامعة الحسن الاول سطات ////

أمير المؤمنين والتحكيم، يعني أنه ماشي طرف في النزاعات…كل واحد عندو الحق يعببر على المذهب والاعتقاد ديالو بدون اللجوء للعنف الفظي أو المادي، وإلا، تتخلى ليه دار بوه…
.
الفصل 41- الملك، أمير المؤمنين وحامي حمى الملة والدين، والضامن لحرية ممارسة الشؤون الدينية . يرأس الملك، أمير المؤمنين، المجلس العلمي الأعلى، الذي يتولى دراسة القضايا التي يعرضها عليه . ويعتبر المجلس الجهة الوحيدة المؤهلة بإصدار الفتاوى التي تعتمد رسميا، في شأن المسائل المحالة إليه، استنادا إلى مبادئ وأحكام الدين الإسلامي الحنيف، ومقاصده السمحة …

الفصل 42 – …الحكم الأسمى بين مؤسساتها…
الفصل 46 -شخص الملك لا تنتهك حرمته، وللملك واجب التوقير والاحترام..

هذا دستور المملكة، ياك؟ مزيان…
إيلى درنا واحد القراءة “بنيوية” كيفما كا يكًول “جان بياجي”، آش غادين نلقاو؟

غادي نلقاو بللي ملكنا “أمير المؤمنين”، مزيان…والدستور ما قالشي بللي أمير المؤمنين كاينتج قواعد دينية أو “عقائدية”، ياك؟ مزيان..نعقلو على هاذي…
غادي نلقاو كذلك بللي الملك أمير المؤمنين “حكم” Arbitre بين المؤسسات ديال الدولة، أي أنه ماشي “طرف” في النزاعات الإديولوجية والسياسية والبرامجية ديال المغاربة، عندو غير صفارة كايصففر فيها مللي شي بوزبال كايخرجو رجليه من الشواري…

وما يجري على السياسة يجري كذلك على المعتقدات الدينية…وعليه، نقدرو نكٌولو كذلك أنه “حكم” Arbitre حتى بين مختلف العقائد الإسلامية، وهي متعددة ما خاصناش ننساوها، لسبب بسيط هو أن أمير المؤمنين ماعندوش شي عقيدة دينية متميزة من غير العقيدة الإسلامية في معناها الشامل للي كايجمع جميع الملل والنحل للي كايعرفها الإسلام…وعليه، ماشي شغل الملك أمير المؤمنين يكون هذا حنفي أو شافعي أو حنبلي أو مالكي، أو شيعي أو خارجي إباضي أو حتى القرينة الكحلة…غير مدونة الأسرة توريكوم بللي القواعد ديالها خذات من بزااااااف ديال المذاهب !!

وعليه، كايبان ليا بللي ملكنا ماخاصوش يحشر راسو في نقاشات المراركة حول نحلها أو انتماءاتها العقائدية أو أفكارها الدينية والمذهبية، مثلا عبر المجلس العلمي الأعلى ديالو ولا عبر الإفتاء…للي بغا يكُول كلامو يكُولو…ولكن بشرط واحد، هو أنه يكُول كلامو بدون اللجوء للعنف اللفظي والمادي…وإيلى مشا حتى شي قمقوم استعمل العنف اللفظي والمادي بحال ذاط الشي ديال النهاري ولا بنحمزة ولا أبو النعيم ولا الفيزازي، يخلي ليه دار بوه بالقانون وبالمحاكم، مادام كاين هناك قانون ومحاكم يسري مفعولها على العالمين…

ولكن هاذ الخدمة راه خاصو يديرها ويوججدها باكم “أحمد التوفيق” للي باين ليا ضااااااربها بنعسة، وماعارفش حتى “الجرائم” للي كاتتقتارف في مساجد المملكة !!
هذا اعتقادي وهانا كانكًولو من أجل المصلحة العامة ديال جميع المغاربة دافعي الضرائب يكونو مالكيين ولا حنفيين ولا شيعيين ولا خوارج يضببرو لمحاينهوم، وللي تقللق يشرب البحر، ولا عييق، نخرج ليه من البيسي ولا التيلفون ديالو كاع…يا الله بيزووو