كود عادل عدنان ////
هادي يومين سافرت فدولة اوربية بين جوجت المدن فطيارة. كنهدر مع صحافي ف”كود” على التسخسيخة ديال السفر مع هاد الجايحة. طلب مني نحكي كيفاش دوزتها. صعيب تلقى ليبيي هاد ليام بين المدن فنفس الدولة. خاصك تقلب وتبقشش فالمواقع اللي كتبيع تذاكر الطيارات٬ حقاش الوكالات دالاسفار مازال ما فتحوش كلهم. المهم الوكالة اللي كنشري من عندها مازال ما فاقتش مع الگلبة ديال كورونا فيروس وتبعاتها. موحالش تگعد بحال عداد من الانشطة. المهم هادا ماشي موضوعنا. تشري تذكرة ما بقاش متعة. حقاش السفر والى بحال الى مسافر للمجهول. بعد ما شريت هاد البيي تفكيري كولو ولى غير فالمطار.
فالرحلات الداخلية فكاع دول العالم تجي ساعة قبل وها انت قاضي الغرض. دابا للا. المطارات ماشي كلها خدامة 100 فالمائة من طاقتها. المطار اللي مشيت منو خدام يالله شي 30 بالمائة. ما كايناش الحركة ولكن باش تسجل الباكاج وتدخل وتركب…. خاصك تجي على الاقل ساعتين قبل. صف طويل بزاف.
لكن قبل ما نوصل للمطار كان خاصني نركب. خرجت من داري جوج سوايع قبل. فالطاكسي او الطوبيس او اية وسيلة نقل خاصك تكون داير لكمامة. باش تخرج من الدار وانت دايرتها حتى توصل للدار اللي غادي ليها. رحلتي انا فيها غير جوج سوايع. مع جوج سوايع ديال الخروج من الدار وزيد عليها جوج سوايع باش تحطك الطيارة حتى توصل فين غادي كتكون دوزتي شي 6 سوايع وانت داير لكمامة. اييه 6 سوايع. ما مسموحش ليك تحيدهم. كلشي حاضيك. الركاب كثر من ليستيوارت وليزوتيست.
هادي بوحدها راها عذاب وخايب.
تصورو هاد الشي زيدو عليه الاحساس بالخوف من تمس شي حاجة تلقى فيها هاد الملعونة ديال كورونا. كورونا كتهيمن علي تفكيرك. صعيب تشوف فيلم براحتك ولا تقرا كتاب. حاولت وفشلت فيهم بجوج.
نرجعو للمطار. كتوصل كتدخل ما كاين لا مراقبة الحرارة لا حتى جيل. والو. كل واحد جايب معاه الماتيريال ديالو. لكمايم وجيل ولى من اهم ما كيدار فالصاك قبل السفر. كلشي عندو. تنسى البيي يلقاوها ليك فالسيستام ولكن تنسى لكمامة ما يهزكش اولا الطاكسي وباش تبغي تسجل باليزتك ما يقبلوكش.
فالدخلة دالمطار اللي ما خدامش كلو صف طويل بزاف. كثر من 45 دقيقة باش توصلك النوبة. فالايام العادية قل من 10 دقايق. اللي تبدل هو ان الباليزة واخا صغيرة ولات كتسجل. صعيب حتى تهدر معاهم ولا تفسر ليهم. كلشي خايف. انت كتبان ليها حامل محتمل لكورونا فيروس وهي كتبان ليك. كلشي كيشك فكلشي. ايلى فالصف شي حد ولا شي وحدة واخا تكون قوقة قرطاسة كتخلع. كلشي عاطيه ماشي شبر ديال التيساع وشبورة هما. جوج ميترو.
غريب الاحساس الانساني مع هاد الجايحة. كيوقع بالفعل التباعد الاجتماعي نفسيا بعدا عاد نشوفو هاديك جوج مترو او مترو ونص.
تدخل للمطار بعد ما تفوت اللي كيقلبو. عالم اخر. مطار بلا حياة. من غير صحاب الروائح والكارو والشراب كاع لقهاوي تقريبا سادين. قلبت ما لقيت والو انا بعدا. يمكن فشي بلاصة بعيدة اكثر. غير هو شكون اللي يزعم ويبعد علي فين غادي يركب.
اللي مثير هو الكار اللي كيدي للطيارة والطيارة فالداخل عالم اخر. كنت كنظن وحقاش شفت هاد الشي فالتلفزيون ان الطيارات كيمشيو غير ب50 بالمائة من طاقتهم. وا للا ياه. وعامرة. عامرة بزاف. 100 يوم ديال كلشي محبوس.
كانو كالسين حدايا جوج لعيالات. فليام العادية تقدر تسول وتجاوب. دابا والو. كلشي داير لكمامة وساكت. الصقيل فالطيارة كسرو غير واحد لوليد صغيور كيهدر مع ماماه. كان وليد ساكت ما بكاش غير كيهدر مرة مرة مع ماماه.
اللي كيزيد المشهد سوريالية هي باش تحط الطيارة. هنا البيلوط كيكول راه فاطار هاد الشي ديال كورونا فيروس بقاو فبلاصتكم متباعدين. اييه شي لاصق فشي جوج سوايع وانت دابا كتقول بقى فبلاصتك.
المهم كينوض الواحد بالواحد. وتصورو طيارة ايرباص 380 كتخوا بهاد الطريقة. اللي فالصف اللخر خاصو مدة طويلة غاد توصلو النوبة.
بعد هاد الشي خاصك تسنى الباكاج. فالمطار كان بلاصة فيها اللي جايين من داخل لبلاد وكاين اللي جاي من الخارج. هاداك كيتسنى كثر. خاصو يعمر ويقيسو ليه الحرارة ويقول ليهم فين غادي. هادو كيتعطلو كثر فالمطار
تخرج بالباكاج خاصك تسنى الطرانسبور. بيس او طاكسي او تران كولوهم نفس العذاب شي شاك فشي وشي منوي من شي وكلشي داير لكمامة.
متعة السفر كتمشي كيعوضها الخوف. كيعوضها القلق. كتولي منكري بزاف. فهاد المدة ديال السفر كدوز طويلة بزاف بزاف.
اللي ما عندوش شي حاجة قاهرة بلا ما يسافر. نقولها لقراء كود. بقاو فمدنكم. يمكن تمتع اكثر ايلى مشيتي لشي مطعم فطنجة ايلى كنتي بحالي ولد هاد لمدينة٬ وتاكل وتشرب كويس حسن ما تغامر وتركب الطيارة.
