الرئيسية > آراء > علاش غايخرج طبيب ففيديو باش يقوليا ” داكشي لي بان فالفيديوات راه عادي و خاصني نطبع معاه حيت قطاع الصحة مقودة عليه “! وا لا يا سيدي ماعندك تا شي مبرر لقلة الجودة د الخدمات الطبية اليوم حيت كلشي مجند مع قطاع الصحة و كلشي خدام و محطوط ليكم صندوق قدو قداش فيه اكثر من سبعطاشر مليار د الدرهم ! آش بغيتي ؟ وا خدم معانا الله يجازيك بيخير
03/04/2020 15:00 آراء

علاش غايخرج طبيب ففيديو باش يقوليا ” داكشي لي بان فالفيديوات راه عادي و خاصني نطبع معاه حيت قطاع الصحة مقودة عليه “! وا لا يا سيدي ماعندك تا شي مبرر لقلة الجودة د الخدمات الطبية اليوم حيت كلشي مجند مع قطاع الصحة و كلشي خدام و محطوط ليكم صندوق قدو قداش فيه اكثر من سبعطاشر مليار د الدرهم ! آش بغيتي ؟ وا خدم معانا الله يجازيك بيخير

علاش غايخرج طبيب ففيديو باش يقوليا ” داكشي لي بان فالفيديوات راه عادي و خاصني نطبع معاه حيت قطاع الصحة مقودة عليه “! وا لا يا سيدي ماعندك تا شي مبرر لقلة الجودة د الخدمات الطبية اليوم حيت كلشي مجند مع قطاع الصحة و كلشي خدام و محطوط ليكم صندوق قدو قداش فيه اكثر من سبعطاشر مليار د الدرهم ! آش بغيتي ؟ وا خدم معانا الله يجازيك بيخير

سهام البارودي – كود//

مورا الفيديوات لي خرجو ديال مرضى كورونا لي فالحجر الصحي نقدر نقول بلي الآراء نقاسمو لجوج ديال التيارات ! التيار ديال ” قضي و عدي آ بن عدي” ديال دوك لي كايموتو على البريكولاج و الحلول الترقيعية ! داك لي كايتهرسو ليه النضاضر و كايشدهم بلاستيك و لا كايكون كايقطر ليه شي روبيني و عوض يجيب بلومي كايلگي ليه شي جفاف لتحت و ينوض يعصرو مرة مرة! هادو كايقولو ليك ” وا بنادم راه ماشي فلوطيل عاوتاني ” ” وا بنادم خاصو يصبر شوية راه هاداك هوا القطاع العام” ” واااا شرب الما من الكابينة مالك يصحابك الطبيب غايتسخر ليك” ” وا ماشي ضروري بابي جينيك تمسح ترمتك بشي حجرة ” و فالجهة الاخرى التيار ديال الناس لي عندها شوية د المنطق و كاتقوليك هادشي لي بان فالفيديوات راه ماشي معقول و خطير و خاص الوزارة الوصية توقف على شغلها و تتحمل مسؤوليتها فتوفير العلاج و مستلزمات العلاج.

ولكن الخطير هنا ! هوا نشوف طبيب خارج ففيديو كايخاصم علينا حيت حگا و الواد قطاع الصحة ماعندوش الامكانيات و الدولة كاتخصص ليه جزء غير كافي من الميزانية و بلي داكشي لي شفنا فالفيديوات عادي و خاصنا نطبعو معاه !

ايوا سمح ليا آ سي الطبيب بالزربة نقوليك بلي داكشي ماشي عادي و ماخاصوش يكون و انا شخصيا ماغانطبعش معاه !وانا كاتجيني خطيرة هاد الهضرة تصدر من طبيب ! حيت بكل بساطة هادي راها وضعية استثنائية و كلشي خدام معاكم ! كاين صندوق كورونا لي فيه اكثر من سبعطاشر مليار درهم مخصصة لمواجهة هاد الفيروس و تأهيل القطاع !ساهم فيه الملك و ساهمو فيه شركات و مقاولات و موظفين و حتى ناس بساط ! كاينين المتطوعين من المواطنين فحال الشاف أمل المداد فكازا لي كاتصايب كل نهار الماكلة و كاتسيفطها للاطباء فالسبيطار ! كاينين الشركات لي عطاو مساهمات من غير الفلوس فحال سيدي علي لي كاتساهم بنسبة مهمة من الامدادات ديال الما للسبيطارات ! آش بغيتو ؟ علاش كاتهضر معايا على البارح ؟ آجي نهضرو على اليوم شنو كاين!

ماتخرجوش دابا تغوتو علينا حيت القطاع مقودة عليه و نتوما اول وحدين عارفينو مقودة عليه و من ديما مقودة عليه و بالرغم من هادشي كولو كانشوفوكم بيخير و على خير واكلين شاربين سايگين الطوموبيلات شارين الفيلات و بزاف منكم مقاولين كبار ! ها لي ملاوح فالعقارات ! ها لي فصناعة الدواء ! ها لي باني لوطيلات ! و علاش بعدا كاتغوتو عليا انا لي مواطنة ؟ واش نتوما ماكاتشوفوش راسكم عندكم جزء من المسؤولية فالمستوى لي وصل ليه هاد القطاع ؟ فين كنتو تانتوما هاد السنين كاملة خدامين فالوضعية الكارثية كيما كاتوصفوها ؟! راه اول واحد مسؤول على القطاع هوما الناس لي خدامين فيه و لاكانو خدامين فقطاع مقودة عليه و ساكتين راه عندها معنى واحد هوا ديك الروينة د القطاع مسلكاهم و مواتية مع مصالحهم الشخصية!

اليوم حنا محتاجين للطبيب ماشي باش يفكرنا بالذي مضى باكثر ماحنا ماحتاجين اطباء يأديو الدور ديالهم على اكمل وجه و ينقذو الارواح و يتجندو معانا باش نحاربو هاد الوباء ماغانجلسوش نبكيو و “الخطأ لا يبرر بخطأ” فماكاين لاش تحاولو تببرو الجودة المتدنية للخدمات الصحية بشي خرجات بهلوانية كاضر اكثر ماكاتنفع.

موضوعات أخرى

03/06/2020 16:00

أقريو كتتاهم سيناريست “شهادة ميلاد” بسرقة قصة “ياقوت وعنبر”.. ومدير شركة “ديسكونيكتد” لـ”كود”: حطينا شكاية لبارح فالمركز السينمائي وفالغالب السيناريست دالمسلسل ماكاينش أصلا