كـود: عمـر المزيـن///

طارق السباعي رئيس الهية الوطنية لحماية المال العام اصدق كيدخل ويخرج فالهضرة بزااف. البارح اعطى تصريح لـ”كود” واليوم وصلنا على أن داكشي اللي قال غير كذوب فكذوب. السباعي أكد أمس الثلاثاء لـ”كود” أنه حضر أولى جلسات محاكمة المتهمين في قضية ما يعرف بـ”فضيحة باديس بالحسيمة” كمراقب وليس كممثل عن الهيئة التي يترأسها أو شيء من ذلك القبيل.

السيد اصدق مسجّل النيابة ديالو باش يدافع على جوج متهمين في الملف، ويتعلق الأمر حسب مصادر “كود”بالمهندسين “فنيش وبنشقرون”. السباعي أوضح لـ”كود” اليوم أنه بالفعل سجّل النيابة ديالو لكن يقدر يسحبها يلا بان ليه أن القضية فيها اختلاس ديال المال العام. لكن آ السي طارق علاش البارح كتگول هضرة واليوم تقلبتي عاود؟ ويلا كنتي كتنوب راه عادي حيتاش هادي المهنة ديالك وما من حق حتى واحد يگولك نوب أو لا .. لكن المشكل هو تگول لينا أنك احضرتي كمراقب لكن الحقيقة شيء آخر.

طارق السباعي تابع في حديثه مع “كود” بالقول: “صحيح سجلت النيابة ديالي ونقدر نسحبها فاي وقت يلا بغيت وحتى هادوك اللي كنوب عليهم مزال مخلصوني وهوما قالو ليا أنهم أبرياء”.

المهم آ السي السباعي فهادي زكلتيها راك زعما انت رئيس ديال الهيئة الوطنية لحماية المال العام بالمغرب وتنوب عن متهمين في قضية شكلت مادة إعلامية دسمة ويتابعها الرأي العام وتخص مال الدولة. شكون باقي يتيقك؟