كود هناء ابو علي ///
ها الكفاءة بدات تبان فحكومة بنعرفة. وشكون اللي كحلها؟ الناطق الرسمي باسم الحكومة وزير الشبيبة والرياضة والثقافة اسمو الحسن عبيابة. يعني التوجيهة ديال الحكومة. الثقافة والناطق الرسمي خاص يكون مولاها سيدي ومولاي. هاد لوزير فيه درجة كبيرة من الغباء.
البارح فالندوة الصحافية هرب وما قدرتش يواجه الصحافيين. ما كيعرفش يفرق بين نسبة النمو وبين الميزانية. دابا ف”كود” نشرو مذكرة تعيين “رئيس قسم التعاون” فقطاع الثقافة.
التعيين فيه اخطاء. عوض انهي الى علمكم كتب “انهي على علمكم”. عوض “عليه فالمرجو منكم تقديم كافة المساعدات” كتب فتعيين “عيهن”.
لفضيحة لكبيرة ماشي الاخطاء الاملائية والمطبعية اللي حشومة تكون فوزارة فما بالكم بوزارة الثقافة٬ هو انو كتب “انني عينت” واش هادا كفاءة. واش المراسلات والوثائق الادارية اللي كيكتبوها الوزراء كدير “انني عينت”. راه كيكتبو “تم تعيين”.
شكون انت يا الفاهيم حتى تكتب بضمير المتكلم.
سالات مذكرة التعيين ب”المرجو منكم تقديم كافة المساعدات اللازمة”. اللي خاصو المساعدات اللازمة هو انت. قبل ما تبدا بيني راسك كفاءة واش من كفاءة. لا تواصل لا كتبة لا فهم للادارة. شفتو صحاب ادريس الراضي اللي وصلو للحكومة شحال كفاءتهم طالعة بزاف.
