كود هناء ابو علي ////

قولو لي يا لمغاربة اللي كنتو دايرين قضية رحيل المدرب وحيد من تدريب الاسود قضية وطنية٬ باش كتحسو اليوم بعد ما تم الاعلان على انفصال بين الجامعة وبين هاد المدرب. واش حياتكم تبدلات. واش نفسيتكم تحسنات. واش احوالكم النفسية صبحات احسن هاد الصباح؟

حرب كبيرة توظفو فيها فالوقت المناسب باش دافعو على مدرب حقق مع المنتخب المغربي لكرة القدم ما عمر شي مدرب سابق حققو. شوفو غير عدد الانتصارات معاه.

كان هجوم خايب بزاف على مدرب كل ما دارو هو رجع الهيبة للمنتخب. باش وصل حدد خطوط حمرا اللي فاتها يمشي فحالو مهما على شانو. مدرب بغى يطلع ويكبر بحكيم زياش وعطاه الشرويطة ورجعو عميد ولكن سيدي حكيم اللي ما مطفروش لا مع فرقتو لا مع المنتخب بغى يفرض لعابة علي المدرب. وحيد كيف معودنا ديما فين ما مشى جرى عليه. ما بقاش يعيط عليه. هاداك حكيم اللي كانو كاع لمغاربة كيبسوه باش زگل بيلانتي مع الملاوي فكأس افريقيا للامم فمصر.

وحيد جا وخلى كاع اللعابة يدخلو الصف. يعرفو باللي كيدافعو على درابو. علي بلاد. وحيد المدرب البوسني اللي شارك فالحرب وهز السلاح باش يدافع على دارو وبلادو فالبوسنة وخلى حياة البدخ والنجومية اللي كانت عندو ففرانسا٬ هاد المدرب كيعرف معنى الدرابو. الراية. الانتماء لبلد. فندواتو الصحافية ديما كيردد. ما كاين حتى حاجة كاينة كثر من العلم. كثر من الدرابو. كيقول لكل لعاب انت مدين لدولتك. خاصك تفتاخر بالتوني. لبلاد اللي ختارتك ماشي انت اللي ختاريتيها. هادا ميساج لزياش ولامثالو.
وحيد معاه سالات التكتلات ها صحاب فرانسا ها صحاب هولندا ها صحاب البطولة ها صحاب بلجيكا. كلشي مع المغرب ولصالح المغرب. سالا فالمنتخب التخلويض. ما بقاش عند السماسرية شي دور. حبس على كلشي. معاه ما بقيناش كنسمعو باللي اللعابة كيخرجو يشيشو. كيخرجو يقصرو.

وحيد ما حيدش هاد الشي وصافي. بل هدر على هاد الشي فاكثر من ندوة صحافية. تصور باش تقضي على هاد الممارسات وتفرشها قدام الرأي العام خاص يكون اسمك وحيد.

وحيد فالحقيقة بين حقيقتنا فالمراية. فضح نفاقنا. فرش تناقضاتنا. عوض ما نديرو مراجعة لكاع العيوب اللي فينا. كان الحل الساهل هو نجريو على اللي فضحنا. كنعتاقدو باللي بالمشكلة غادية تحل. هو فاللخر خرج راسو مرفوعة. اييه هادي المرة الثالثة اللي كيأهل شي منتخب للمونديال وما كيمشيش معاه: الكوت ديفوار واليابان والاسود. لكن ظل وفي لنفسو. وفي لقناعاتو. هو ما تبدلش. ما تغيرش. باش قال لليابانيين ما غاديش نعيط على نجمكم حقاش ما صالحش للمنتخب وهما ردو عليه راه كيجيب فلوس كثيرة للكورة٬ هو اللي خرج رابح. بقى مدافع على الكورة ماشي على البيزنس. بقى على موقفو. فالمغرب باش خيروه بين يرجع زياش ويبقى مدرب٬ رفض. حقاش ما مقتاعش بيه. مشى وما تنازلش علي قناعاتو
هو غادي يدخل للتاريخ بسباب هاد القناعات.

التاريخ غادي ينصفو.