كود كازا ///

هاداك رئيس الرجا كون البدراوي كون كان يسكن كون حسن ليه. لكن كيهدر بزاف وباش بدا المعقول تفرش. مدرب تبدل بعد 3 دورات والراجا الفرقة لكبيرة ما ربحات حتى ماتش لحد الان فالبطولة واليوم جاتو ضربة اخرى.

اليوم خسر اول ماتش فعهدو فالبطولة الوطنية الخاصة لكرة القدم داخل القاعة فكازا مع اللوكوس لقصر لكبير ب5 ل3. الماتش اللول للراجا فهاد البطولة وتلعب فكازا وكانت نتيجتو خايبة للخضرا

هاد البدراوي دابا خاصو يبدل استراتيجيتو. اول حاجة يحيد حساباتو فتويتر والفايسبوك ويسكت ويمشي يخدم. ما يبقاش يهدر حتى يدير علاش.

رئيس راطا حتى افتتاح اكاديمية الرجاء لكرة القدم اللي ما دار فيها والو. لقاها موجودة ولكن زگلها باش قلق اللعابة بحال متولي وغيرو وما عرضتش عليهم

الراجا بحال فراقي خراين ما كانش عندهم كرة القدم داخل القاعة او حتى كرة القدم النسائية٬ مشاو شراو فراقي كاملة وبداو البطولة. كان عليهم يبنيو ولكن فضلو الحل الساهل. دابا لحساب معاهم غادي يكون قاصح